Hlemhlêtnaah min bei a nih chuan dâwt a ni ang - Lalsawta

Mizoram Pradesh Congress Committee president Lalsawta chuan nimin khan Congress Bhavan-a political session-ah thu sawiin, eirûkna leh hlemhlêtna chungchanga amah beih a nih chuan, dâwt a nih tur thu a sawi.

Lalsawta chuan, Congress party hma lam hun chu a kutah a awm tih sawiin, "MPCC president Lalsawta hi hlemhlêtnaah min bei a nih chuan dâwt a ni ang, an finfiah thei lo a nih chuan a man a to khawp ang. Ka tum chu ram leh hnam tan a ni," a ti.

Sorkar duh vanga rilru fím put theih loh chu ram tan a hlauhawm thu sawiin Lalsawta chuan, "Sorkar ve hrim hrim tumin keimah hi a mimal takin min rawn sawichhe dawn, ka hlau lo. Mahse, keini chuan kan sawichhe ve tur a ni lo," a ti a; Congress party mi, mi hmaa thusawi pha chinte chu party dang sawichhe lo tura a duh thu a sawi.

Congress president Lalsawta chuan, Mizo ram, hnam leh sakhaw tan rinawm a ngaih thu sawiin, "Rinawmna tel lo chuan engkim hi a ho vek. India Constitution siamtute pawhin an dah pawimawh ber chu rinawmna a ni. Mipui thlan chhuahte pawh rinawmna thutiam an lak tur an duang a, hlauhna leh duhsak bik nei loin, hmangaihna nen huatna tel loin mi tu pawh ka enkawl ang, tiin an thutiam lak tur an duang a ni," a ti.

MPCC President chuan, Pathianin Congress party a hruai a, mi ṭha leh rinawm a pe zel nia sawiin, "June thla chhungin politics khelh fuh tum lo, tih dik leh siam ṭhat tumte inlawm luhna rûnpui kan nei dawn," a ti a; Congress party-a nihna neite'n taima taka an thawh rahte hlim takin an seng mek niin a sawi bawk.