Thuneitute'n Champhai Jail an enfiah

Supreme Court leh Gauhati High Court Principal Bench thupek angin Mizoram State Legal Services Authority (SLSA) member secretary R Vanlalena chuan nimin khan Champhai District Jail a tlawh a, thuneitu dangte'n ṭawiawmin jail dinhmun an enfiah.

R Vanlalena hian Champhai District Jail-a táng awm thei zat te, mipa leh hmeichhe táng zat te, táng mek zinga court-in bail an phalsak tawh, eng emaw harsatna vanga la chhuak thei lote chungchang a endik. Champhai Jail-ah hian táng mi 145 an awm mek a, tángte chu mipa 129 leh hmeichhia 13 bakah, an nute'n an awmpui naupang pathum an ni.

SLSA Member Secretary ṭawiawmtu Sylvie Z Ralte, Champhai additional district & sessions judge chuan, ruihhlo ṭhat lohzia leh ruihhlo do tura ṭan lak a ṭul thu sawiin, jail-a awmte chu an tàn chhungin an nun dan thlâk a, khawtlang leh ram tan a ṭha zawnga ke pên turin a fuih.

R Vanlalena hian Champhai District Court a tlawh bawk a; Champhai District Legal Services Authority leh chief judicial magistrate secretary V Vanlalhriata pawhin a ṭawiawm a ni.