Mizo thil leh hnam làm zir zote thlah

Pachhunga University College (PUC)-a Mizo department leh Art & Culture department ten 'Certificate Course in Mizo Cultural Studies and Performing Arts' an buatsaiha zir chhuakte hnena certificate hlanna inkhawm nimin khan PUC-ah buatsaih a ni a, course zir zo mi 23 hnenah principal Dr H Lalthanzara'n certi­ficate hlân.

Art & Culture dept. leh PUC Mizo department hian kum 2017 aṭangin 'Mizo Cultural Studies and Performing Arts' zirna an kalpui ṭan a, kumina zir chhuakte chu batch ngana an ni.

Prof. H Lalthanzara chuan, "Mizoram leh India ram páwna kal chhuah cháng hian mahni hnam làm entir a ngaih cháng a awm a, mahni hnam làm pakhat pawh thiam lo nih a zahthlak hle a ni," a ti a, zirlaite tana Mizo hnam nunphung leh hnam lâm zirna buatsaih a ni chu zirlaite vanneihna a nih thu a sawi.

Course zir zote thlahna inkhawm hi assistant professor Lalrotluanga'n a kaihruai a; PUC Mizo department HoD Dr H Laldinmawia leh Art & Culture deputy director K Lalruala te pawhin thu an sawi a ni.