Sorkar mek hi mipui ṭawngṭai chhànna anga rorel tura thlan a ni - MNF Treasurer

MNF party chuan nimin khan Mizo Hnam Rûnah chhung inkhawm an hmang a, MNF treasurer K Vanlalauva'n thu sawiin, MNF sorkar chu mipui ṭawngṭai chhànna anga rorel tura thlan chhuah an nih thu a sawi.

K Vanlalauva chuan, MNF sorkar chhungin harsatna chi hrang hrangin a tlâkbuak tih sawiin, "Hun khirh kan tawh laia kan ram hruai tur hian siamtuin Pu Zoramthanga kaihhruai sorkar a ruat tlat a. Kan sorkar neih mek hi Zoram mipui ṭawngṭai chhànna anga rorel tura thlan chhuah a ni," a ti.

Kohhrana rawngbawl-tute'n pulpit aṭanga politics an sawi ṭhin chungchangah K Vanlalauva chuan, "Bible-ah roreltute hi Pathian ruat an ni tih a lang. Pulpit aṭanga ram rorelna thu kan puithiamte, revival speaker-te leh pastor-te'n an sawi hi a thiang. Amaherawhchu, an beramte hnenah rorelna kalpui an duh dan an sawi mai tur a ni," a ti a; tute party lawmna tur emaw, tute party vaw zawng bika thu sawi chu rawngbawltute tih tur piah lam a nih thu a sawi.

MNF Treasurer chuan, MNF chu hnam movement kengtu awmchhun a nia sawiin, "Kan hruaitu hmasate an awm ta lo tih vanga kan hnam movement kha an sawichhia a, archuk­tuiloa an sawi emaw, an ziak a nih chuan an thu a ni. An lu chungah meiling an chhêk a, an tan a la pawi ang," a ti.