Samagra Shiksha hmalakna tur sawiho
School Education department leh Samagra Shiksha-a hotute chuan nimin khan MRB conference hall-ah Mizoram Samagra Shiksha hmalakna atana sorkar laipuia Ministry of Education-in a pawmte an thlirho a, School Education secretary Dr Lalzirmawia Chhangte-in a hmanpui.
Dr Lalzirmawia Chhangte chuan, Mizoram sorkarin syllabus leh curriculum a hmante chu NCERT zuia tih a nih thu sawiin, "Textbook pawh NCERT kaihhruaina zuia siam tho a ni. Heti chung hian kan ṭhalaite all India service-ah an tling hlei thei lo hi eng vang nge ni ang? Khawi lai tak hi nge kan tih fuh loh leh chak lohna tih hi ngaihtuah a ngai hle," a ti.
Education Secretary chuan, classroom-a inzirtir dan chu exam-a tih ṭhat tum lutukna a awm theih thu sawiin, "NCERT textbook-in min hruai a tumna hi hriat mai ni loin, engtia tih tur nge tih ngaihtuah thiamna neih a ni a, heti lamah hian kan kal nat a, zirlaite kuta mawhphurhna dah thiam a pawimawh," a ti a; classroom-a zirtir dan en ngun leh zirtirtute intuaithar a ṭul thu a sawi.
Ṭhutkhawmah hian State Level Higher Secondary School Plugging Challenge 2022-23 lawmman sem a ni a; pakhatna Vairengte HSS, pahnihna Lungsen HSS leh pathumna Sangau HSS an ni.