Hei aia ṭha kan nih theih beiseina avangin ZPM din a ni - Dr Vanlalthlana

ZPM Legislature Party secretary Dr Vanlalthlana chuan, Mizorama sorkar ding tawhte'n ram tan theihtawp chhuahin hma la tawh ṭhin mah se, a aia ṭha deuh zawk beiseina avangin kum 2017-ah ZPM din a nih thu a sawi.

ZPM Aizawl West-II Block-in nimina Woodland Hill-a political training an buatsaihah thu sawiin Dr Vanlalthlana chuan, "Sorkar kan neih tawhte hian kan ram tan theihtawp an chhuah tawh ṭhin. Kan ram dinhmun kan en a, ram dang leh state dang kan thlir a, hei aia ṭha deuh hi chu kan ni ve thei ang a tih beiseina avangin ZPM hi kum 2017 khan din a ni," a ti.

Dr Vanlalthlana chuan, ZPM an infuihna ber pakhat chu taimakna a nih thu sawiin, "Mizoram ṭha zawk din tur hian tih tur kan nei a, kan tu leh fate tana ram chhenfakawm ni tura kan ram buatsaih hi kan mawh a ni," a ti a; mipui sorkar siam turin nihna neih leh neih loh thuah harsatna a awm tur a ni lo tih a sawi.

Aizawl West-II vil tura ZPM-in an ruat Lalnghinglova Hmar pawhin thu sawiin, hun an hman ṭhat dan azirin West-II bialah ZPM-in MLA an neih leh neih loh a innghat tih a sawi a, "ZPM boruak a kâng mek zel a, mipui rilru pawh a in hawng em em. Kalphung thar, mipui sorkar siam tur hian mipui an inpeih em em a ni," a ti.