KHAWTHLIR

YMA-in thisen pe

YMA, Kawnpui Chhimveng Branch chuan nimin khan an YMA Hall-ah thisen pek an huaihawt a, mipa 29 leh hmeichhia 14-te'n Kolasib District Hospital tan thisen unit 43 an pe.

Graduation Day

Mizoram Christian College (MCC) chuan nimin khan Graduation Day hmangin, MCC aṭanga under graduate zir chhuak hmasa ber turte an thlah a, Synod moderator Rev. Dr C Chawnghmingliana'n hmanpuiin thu a sawi. MCC principal hmasa ber Rev. Dr Lalchungnunga leh principal ni mek Dr Tawnenga ten thu an sawi bawk. Graduation Day hi Synod hruaitu dangte leh MCC Governing Board member-te pawhin an hmanpui a ni.

Manipur ráltlân 294-in an pung

Manipur tualchhung buaina avangin sahimna zawnga Mizorama lut ni tin an awm belh zel a, nimin khan darkar 24 chhungin 294-in an pung. Nimin tlai dar 5 thleng khan Manipur ráltlân mi 10,446 an awm a, June 8 aiin 294-in an tam zawk. District tina awm mek zat chu - Kolasib-ah mi 3,680, Aizawlah 3,750, Saitualah 2,459, Champhaiah 243, Mamitah 109, Khawzawlah 79, Lungleiah 63, Serchhipah 54, Siahaah 11, Lawngtlaiah 10 leh Hnahthialah pariat an ni.

ZPM inkhawm

ZPM chuan nimin khan an party pisaah political session an nei a, general secretary H Lalchhawntluanga'n thu sawiin, "ZPM hian hmabak êng tak kan nei a, kalphung danglam tak, party dangte'n an la tih ve ngai loh thil tam tak kan tih mek avang hian democracy ramin hmasawnna tura ruangám a din tung ding turin hma lam kan pan zel dawn a ni," a ti.

BJP inkhawm

BJP, Mizoram Pradesh chuan nimin khan an pisa, Atal Bhavan-ah political session an nei a, an party vice president R Vanramchhuanga'n thu sawiin, "Mizoramah BJP a sorkar loh vangin state-a sorkarna chelhtute'n central scheme an lo pawngsual ṭhin a, vawiin thlengin thingtlanga rethei tak tak PMAY scheme kaltlanga mahni in leh lo ngeia cheng thei turte'n an chanvo an chang thei lo a, a pawi tak zet," a ti.