Khua leh veng ṭhenkhatah Total lockdown puan a ni
August 8, Inrinni leh Pathiannia ZMC laboratory-a Covid-19 vei hmuh chhuah zingah Mizoram chhunga mi dang aṭanga kái chhâwng mi pali an awm avangin Aizawla veng eng emaw zatah leh khaw dang ṭhenkhatah nimin aṭang khan inkhàrkhip a ni.
Sorkar thuchhuah tarlan chinah, August 8, Inrinnia Covid-19 vei ZMC-a hmuh chhuah zingah Mizoram chhunga mi dang aṭanga kái chhâwng nia hriat Health department doctor pakhat leh Mizoram police pahnih an tel.
Covid-19 vei doctor pakhat hruai ṭhintu driver pawhin hripui a kai tih nimin khan hmuh chhuah a ni a, hei erawh hi chu nimin tlai dar 6:30 thleng kha chuan sorkar official aṭangin tarlan a la ni lo.
Covid-19 vei doctor chenna veng Dawrpui Vengthar Local Task Force (LTF) chuan Aizawl DC an ràwn hnuah, nimin tlai dar 5 aṭang khan tiam chin awm loin an vengah total lockdown an puang a, Dinthar veng nena an inrìna aṭanga Vaivakawn nena an inrîna Sairang panna kawngpui báwr chu containment zone-ah an puang nghal. Aizawl West College-a zirlai admission ti turte pawh kal an phal rih lo.
Doctor hruai ṭhintu driver awmna veng, Venghlui LTF chuan nimin aṭang khan an vengah tiam chin awm loin total lockdown an puang. Hei hian Aizawl Head Post Office, FCSC directorate, Apex Bank (Main Branch), Secretariat Annexe-a office zawng zawng, Assembly House, Governor’s Office-te a huam lo.
Republic Vengah pawh nimin tlai aṭang khan total lockdown puan a ni a; Mission Vengthlang leh Tuikual South pawhin nizan aṭang khan total lockdown an puang bawk. Covid-19 vei doctor thawhna, Aizawl West CMO pisa awmna, Kulikawn LTF chuan nimin aṭang khan Aizawl West CMO office awmna Neuva Section huam chhung chu total lockdown a nih thu an puang.
Sairang Village Task Force chuan an khaw mi Covid-19 vei hmuh chhuah a nih avangin nimin khan an khuaah total lockdown an puang a, hripui veiin hnim-hnaih a neihte an chhui mek a ni. Melriat khuaah pawh hripui vei hmuh chhuah tâkin in leh dàwr tlawh a neih avangin magistrate hriatpuinain nimin khan total lockdown an puang a, inkhàrkhip hian naktuk tlai dar 6 thleng a awh ang.
Electric Veng LTF chuan an venga section pahnih chhungah imkharkhip an puang a; Mission Veng LTF chuan Mission Veng Bazara Kima Xerox Dawra Inrinni zing dar 8 hnu lama kalte chu ina tawm-im turin an hriattir.
Chanmari LTF chuan an vengah positive hmuh chhuah a nih thu chhuahin mipuite chu fimkhur lehzual turin an chah a, lockdown erawh an puang lo. Veng dangah pawh positive contact awm theia ngaihte inhriattir tur leh chhuak lo tura hriattir mi eng emaw zat an awm bawk.
Lockdown Puangte
1 Dawrpui Vengthar
2 Electric Veng (Section-IV&V)
3 Kulikawn (Neuva Section)
4 Melriat
5 Mission Vengthlang
6 Republic Veng
7 Sairang
8 Tuikual South
9 Venghlui