Manipur ráltlânte ration card (ONORC) hmanga buhfai pek theih a la ni rih lo

Mizorama awm mek Manipur ráltlânte'n One Nation One Ration Card (ONORC) programme hnuaiah Mizoramah ration buhfai an la la thei rih lo a, sorkarin an mamawh danin a pe ṭhin.

Vanglaini palai zawhna chhangin Food, Civil Supplies & Consumer Affairs (FCSCA) hotute chuan, Manipur ráltlân Mizorama awm mekte'n ONORC hnuaiah ration buhfai an la lak theih loh thu an sawi a, "Manipur ráltlân, India khua leh tuite'n Mizoramah ONORC kaltlanga ration buhfai an lak theih nan theihtawp kan chhuah. Manipur-ah tualchhung buaina vangin internet tihtawp a ni a, ration buhfai pe turin electronic point of sale (EPOS) portal-ah an data kan hmu thei rih lo," an ti.

FCSCA hotute hian sorkar laipui hotute hnenah ration buhfai lâkna tur bik portal tinung turin an thlen tawh a, Manipur-ah ration buhfai la tura an inthlun zawmna hman theih a nih loh chhan zawng chhuaka tifel vat turin sorkar laipuiin a rawn hriattir tawh bawk.

FCSCA hotute chuan, "Hmalakna a kal tluan chuan June thla chhungin ration buhfai kan pek theih kan beisei. Tunah hian Mizoramah an ration buhfai la thei rih lo mahse kan department chuan DC-te rawn dil ang chu kan pe deuh zel," an ti a, NGO kaltlang pawhin an pek ṭhin thu an sawi.

Tarlan tawh angin, May 25, 2023 khan FCSCA department chuan thuchhuah siamin, One Nation One Ration Card angin Mizorama buhfai semtu (retailer)-te chu India khua leh tui raltlan zinga ration buhfai la turte hnar lo tura hriattir an ni.

FCSCA chuan, Ministry of Consumer Affairs, Food & Public Distribution, Department of Food & Public Distribution thuchhuak angin ONORC hnuaiah migrant NFSA beneficiary (AAY & PHH)-te'n India ram khawi hmunah pawh an ration buhfai an la thei tawh tih a tarlang a; chumi avanga FPS dealer (retailer)-te'n buhfai an mamawh belh a nih chuan an ePoS device hmangin an mamawh belh zat an thlen tur a ni.

ONORC hnuaia ration lak (transaction) hi sorkar laipui chuan a tam thei ang ber nei turin state tinte a nawr nasa tih tarlangin FCSCA hotute chuan, "Tuna Mizorama rawn raltlante pawh an ration quota pangngai chán loin, an bul hnaia fair price shop (retailer)-ah an la thei. Retailer-te'n an lo hnar tur a ni lo a, an ration card an lo dil kher tur a ni lo bawk," an ti a; beneficiary-te'n an ration card number emaw, Aadhaar number emaw an hriat chuan a tâwk mai tih an tarlang.

June 10, Inrinni tlai dar 5 thlenga Manipur aṭanga sahimna zawnga Mizorama rawn lut hi sokrar chhinchhiah danin mi 10,591 an ni.

District hrang hrangah hetiang hi an lo luh dan a ni: Kolasib-ah mi 3,722, Aizawlah 3,750, Saitualah 2,542, Champhaiah 243, Mamitah 109, Khawzawlah 79, Lungleiah 63, Serchhipah 54, Siahaah 11, Lawngtlaiah 10 leh Hnahthialah pariat an ni.