Golf Course lâkluh aiin senso a tam

Thenzawl Golf Course enkawlna atan thla khatah cheng nuai 5-7 vel sên a ngaih laiin, Golf Course aṭanga sum lak luh chu thla khatah cheng nuai 2-5 vel a ni.

Mizoram Journalists' Association (MJA) member-te chuan June 9-10, 2023 chhung khan Thenzawla Police Training School leh Golf Course an tlawh a; MJA member-te hi Aizawl bakah, Serchhip district leh Lunglei district-a mite an ni a; Police Training School (PTS) leh Golf Course hotute'n an hmunhmate fanpuiin, an dinhmun an lo hrilhfiah a ni.

Thenzawl Golf Course enkawltute sawi danin, Golf Course enkawl nan a tlem berah thla khatah Rs 5,00,000 aṭanga Rs 7,00,000 vel sên a ngai a, chutih laiin, Golf Course aṭanga sum an lak luh chu thla khatah Rs 2,00,000 aṭanga Rs 5,00,000 vel inkar a ni thung.

Golf Course-a luh man, a pangngai aia tlem deuh hleka luh theih hun an siamah tlawhtu an tam deuh a, sum lut pawh a tam ve deuh ṭhin. Covid-19 vanga inkhuahkhirhna thlahdul tirh lamah tlawhtu an tam leh deuh a, thla khata sum lak luh pawh Rs 7,00,000 a tling chho a; tunah chuan tlawhtu awm ve reng mah se, sum lutin inenkawlna senso a phuhru zo lo a ni.

Golf Course-ah hian riahna pindan 30 a awm a, chu'ngte chu a khah vek cháng awm zauh zauh mah se, hun tam zawkah chuan a khat lo tlangpui.

Golf Course hi hawn a nih hnuah Bangladesh aṭangin golf khel tur mi pakhat a kal bak chu golf khel tura ram dang aṭanga kal an la awm lo.

Golf khelhna phûl chu a tira a la rualtu tur balu dah bak dah belh a nih loh avangin khawl hmanga tihrual thei a ni tawh lo a, enkawl dan tur dik taka enkawl theih a ni tawh lo a ni.

MJA member-te'n PTS an tlawhnaah principal Ruatsanga Ralte hoin an lo dawngsawng a, an hmunhmate fanpuiin, training an neihpui dante an lo hrilhfiah.

PTS hotute sawi danin, police training-na hi kum 1973 aṭang khan 1st MAP Training Wing hnuaiah March 31, 1986 thleng kalpui a ni a, April 1, 1986-ah amaha inrêlbàwlna hrang neiin a awm a, Lungverhah Police Training Centre tiin kalpui a ni. Lungverh aṭangin kum 2011-ah tuna a awmna Thenzawlah sawn a ni a, February 20, 2012-ah Police Training School-ah hlàn kai a ni.

PTS-ah hian a din tirh aṭangin mi 16,311 ṭha taka training chhuahtir an ni tawh a, tunah hian training mek mi 279 awmin, mipa 168 leh hmeichhia 111 an nih thu PTS hotute chuan an sawi.

PTS-A TRAINING COURSE
■ RC basic training - chawlhkar 45
■ ASI (Ministerial) basic training - chawlhkar 12
■ SI (Ministerial) basic training - chawlhkar 12
■ HC (Operator) basic training - chawlhkar 12
■ FSO basic training - chawlhkar 12
■ SI (Unarmed Branch) basic training - chawlhkar 45
■ ASI (Unarmed Branch) basic training - chawlhkar 45
■ Refresher Course - chawlhkar 8
■ SI (Armed Branch) Pre-Promotion Course - chawlhkarc 8
■ SI (Unarmed Branch) Pre-Promotion Course - chawlhkar 12
■ ASI (Unarmed Branch) Pre-Promotion Course - chawlhkar 12
■ Platoon Commander Course - chawlhkar 12
■ SUO Cadre Course - chawlhkar 12
■ JUO Cadre Course - chawlhkar 12
■ Hun awm dan azirin PSO training, Training of Trainer Course, Commando Course, Orientation Course leh a dangte kalpui a ni bawk.