Chief Minister vua leh vang kawng laitute'n environment an tichhe nasa - ZPM Ṭhalai

ZPM Ṭhalai chuan, MNF kaihhruai sorkarin leiba hmanga chhungkaw induhsakna a kalpui leh chumia hmalaknain Mizoram leilung, thing leh mau (environment) a tichhe nasa nia sawiin, pawi an tih thu an tarlang.

ZPM Ṭhalai Headquarters hruaitute chuan an vice president Zoramchhana Sailo hoin June 10, 2023 khan Khamrang-Dilsei-Selesih leh Sirvakawn-Selesih by-pass road laih mek a hmunah an tlawh a; kawng laihna atan Mizoram sorkarin NABARD hnuaia Rural Infrastructure Development Fund aṭangin cheng nuai 5,924.86 a pung awmin a pûk a, chuta ṭanga nuai 658.32 chu Mizoram sorkarin a tum ve tur a ni.

Kawng laitu tur zawnna atan restricted tender chhuah a ni tih sawiin ZPM ṭhalaite chuan, "Bialtu MLA, chief minister leh PWD minister ni bawk Pu Zoramthanga vua leh vâng mi paruk hnenah pek a ni. Hetianga chhungkaw induhsakna hleihluak taka CM-in a pek kawng laih hna thawktu contractor-te'n an leivûngte mumal taka a paihna hmun siama paih loin, kawng thlangah an nawr thla a, kawrte hnawhin thing leh mau leh nungcha tam tak an tichereu a ni," an ti.

ZPM Ṭhalai chuan, kawng laihah environmental clearance a awm loh thu leh environmental assessment tih a nih loh thu an sawi a, "Cheng nuai tam tak a pung awma pûkna turah a thawktute pawh mipui hriat tlan ni loa mi tute emaw duhsak bîk an ni ṭhin hi a thianghlim lo," an ti a; MNF sorkarin mipui a huap zawh lohzia a tihchian thu an sawi.

ZPM ṭhalaite tarlan danin, kawng siam hna chu March 2024-ah zawh tur a ni a, chutih laiin, km. 28 laih turah km. 10 êrh âwrh chauh laih a la ni. Cement concrete (RCC)-a chhûn leh vek tur a la ni bawk.