Bairabi S khawtlangin an beisei anga hna thawh loh laite MLA-ah an thlen

Kolasib bialtu MLA K Lalrinliana chuan June 10, Inrinni khan a bial chhung Bairabi khuaa hmalakna hrang hrang a tlawh a; Bairabi South khawtlang hruaitute chuan, an beisei anga hna thawh loh laite an lo thlen.

K Lalrinliana hian, River Training Works at Tlawng River, Bairabi hnathawh kal mek te, Bairabi North leh South-a in hmun nei lote tana MLA-LADS hmanga in hmun ruahmanna kal mek te, Zophai ramri hnaih inkalpawhna thawm ṭhat hna kalpui mekte leh, Bairabi Games & Sports Association football khelmual laih mekte a enfiah a ni.

Tlawng lui lian vanga Bairabi South-in harsatna an tawh ṭhin sutkianna tura River Training Works at Tlawng River hna thawh mek a tlawhnaah Bairabi South khawtlang hruaitute chuan, tui lianin kopang a lak hêk zel vênna tura hnathawh ṭhen khatna, ṭhen thumna leh ṭhen linate chu ṭha tak a thawh a nih laiin, ṭhen hnihnaah erawh beisei angin hna kalpui a nih loh thu an lo hrilh.

Bairabi South khawtlang hruaitute chuan, hna a khaihlak reng chuan ruahtui tlâk tam hunah harsatna lian zawk a thlen an hlauhthawn thu an sawi a ni.

Minister ṭawiawmtu PWD executive engineer R Lalduhthlanga chuan, hna chu October 17, 2023 chhunga zawh hman tura ruahman a nih thu leh, tun dinhmunah hna thawh tur zinga 70% thawk zo tawh anga chhût a nih thu a sawi.

In hmun nghet nei lote'n in sakna tur hmun an neih ve theihna tura MLA-LADS hmanga Bairabi South-a in hmun 56, Bairabi South lei bula in hmun 43 leh Bairabi North-a in hmun 56 ruahmante chu K Lalrinliana chuan a hmunah a en a; Bairabi GSA tana football khelmual laih mek pawh hnathawh dan a en bawk.

K Lalrinliana hian Zophai ramri hnaiha inkalpawhna ṭha a awm theihna tura kawng thawm ṭhat hna thawh a tlawh a; ramri venhim nan leh ram hauh nan Zophai hmunah hmasawnna hnathawh kalpui a pawimawh thu a sawi.