Synod-in kum 2022-23 ah cheng vbc. 372.72 a hmu

Mizoram Synod chuan 2022-23 financial year chhung khan Rs 3,72,72,76,408 (vbc. 372.72) a hmu a, Rs 56,79,20,267 (vbc. 56.79)-in kum hmasa 2021-22 an khûm.

June 6-8, 2023 chhung khan Synod Executive Com­mittee (SEC) vawi 302-na an ṭhukhawm a, JM Lloyd Hall, Synod Office-ah neih a ni. Synod moderator Rev. Dr C Chawnghmingliana'n kaihruaiin, SEC member 130 an tel. Ṭhutkhawmah hian report-te ngaihthlak a nih bakah, thu pawimawh hrang hrang rel a ni.

Synod finance officer Rev. VL Luaia Hranleh tarlan danin, Mizoram Synod hian kum 2022-23 chhunga sum an hmuh zawng zawng Rs 3,72,72,76,408 zinga Rs 2,09,78,41,247 chu Pastoral hnuaia hmuh a ni a, Rs 1,62,94,35,161 chu Mission hnuaia hmuh a ni thung. Pastor bial hrang hrang aṭangin thawhlawm Rs 3,47,59,13,799 a lut a ni.

Kum 2022-23 chhung khan Mizoram Synod chuan Rs 3,07,45,80,400 an hmang a; chu'ng zinga Rs 1,73,14,40,695 chu Pastoral hnuaia hman niin, Mission hnuaiah Rs 1,34,31,39,705 hman a ni thung.

SEC ṭhutkhawmah hian rêl tura chhawp chhuah (agenda) 60 chuang a awm a; chu'ng zingah chuan biak-in leh a vêla rualbanlote tana remchanna siam chung­chang te, corruption do leh a kaih­hnawih chungchang te, inkhawm tihtlêm chung­chang zirchiannate a tel a ni.