Congress-in Lalsawta hruai an ring tâwk; Defamation case kan la ngaihtuah ang - MPCC

MIzoram Pradesh Congress Committee chuan June 10, 2023 khan thuchhuah siamin, MPCC president Lalsawta'n Mizoram Congress party a kaihhruai dan chu ṭha tâwk an tih thu leh, an party aṭanga báng ta KS Thanga'n a puhnaah a ṭul angin inpuh hmingchhiat thubuai, defamation case an la ngaihtuah dawn thu an tarlang.

MPCC chuan, KS Thanga a bànna lehkhaah thu dik lo leh puhna dik lo tam tak a awm niin an tarlang a, "Kha'ng thu dik lo leh puhna dik lote kha kan President tihhminghliau tumna a nih bakah, mawi lo taka Congress party beihna a nih avangin a ṭul dan angin defamation case pawh kan la ngaihtuah ang," an ti.

Congress party aṭanga a bàn chungchangah KS Thanga'n a tih phâk tâwk leh a tih àwm tâwk a ti nia an hriat thu sawiin MPCC chuan, "Congress party-ah dinhmun ṭha a chan lai pawhin Congress party mi mai ni lo, Mizoram mipuiin a mizia chiang taka kan hriat a ni a, parliamentary secretary leh minister dinhmun hiala hláng kaitu party a chhuahsan tâk beih lêt nana a thu ziahte pawh a tih àwm tâwkah kan ngai," an ti a; an party mipuite chî-âi lo turin an ngen.

MPCC chuan, sorkar ṭha an dinna turah an tana hnawkte thensak turin Pathian an dil ṭhin nia sawiin, "Kan tih ni miah loin ṭhat loh theih lohna báwma awm thei lo chu anmahni an insenghawi ṭan niin kan hria," an ti a; "Kan president Pu Lalsawta’n Pathian ráwn chunga party a kaihhruai dan hi ṭha kan tiin kan ring tâwk a... kan zui zel dawn a ni," an ti bawk.