VC/LC inthlan buatsaih danah ZPM party-in mak tih an nei

Zoram Peoples' Move­ment (ZPM) party hruaitute chuan Inrinni khan an pisaah thuthar thehdarhtute an kâwm a; Mizoram sorkarin State Election Commission (SEC) kaltlanga village council (VC) leh local council (LC) inthlan an buat­saih danah mak tih tak tak an neih thu an sawi. 

ZPM president Lal­­liansawta chuan, August 5, 2020-a VC/LC inthlan puan a nih rualin nomination tih hun hawn nghal a nih thu leh August 11-ah khâr a nih dawn thu sawiin, "A karah public holiday ni hnih Inrinni leh Pathianni a tla a, inbuatsaih hun ni nga chiah a awm," a ti.

Lalliansawta chuan, nomination koh hnuah returning officer ruat chawpte a awma an hriat thu sawiin, "Heti chûk chûka VC/LC thlan buatsaih hi a awm ngai lo. Sorkar hi mipuiin an hre chiang telh telh a, hriat chian leh zual hma an chuh ni berin kan hria," a ti a; August 4-ah SEDP an sem a, August 5-ah inthlan puan a nih thu a sawi a ni.

Khawlaiah Covid-19 a darh ṭan a, hmun tam takah total lockdown an puang mek tih sawiin ZPM President chuan, "Chutih laia inthlan puan luih hi mipui harsatna tawrh mek sorkarin a hre lo niin kan hria. Polling booth leh polling party zawng zawngte PPE-a thuam vek turin kan phût. Lirnghing vangin Tuipuiral mipui an chîâi a, eibar zawng tura hna pawh an thawh theih loh laia VC inthlan puan khum hi thil mak a tling," a ti a; Tuipuiral khuate bik tan inthlan hun hran ruat an duh thu a sawi.

Lalliansawta chuan, VC/LC inthlanah hian ruling MNF, Congress leh ZPM-te inthlûr fál tura ngaih a nih thu sawiin, "Tun hma lama tih dan ngai lohin recognised party-te'n an party symbol chu common symbol atan an hmang ang. ZPM hi recognised party a la ni ve lo a, ECI-ah registered party kan ni. Common symbol hman phalna kan dil a, SEC-in min phalsak. Free symbol zinga mi Khumbeu kan thlang tawh a, SEC chungah kan lawm hle a ni," a ti. 

ZPM president Lalliansawta chuan, recognised party ni lote chu candidate tin ECI registration certifcate thil tel tura tih an nih thu sawiin, "Hripui vanga khaw tam tak inkhàrkhip vang te, inkalpawhna kawng chhe lutuk vanga transport service mumal loh vangtein ECI registration certificate hi khaw tinah thawn thlen hman rual a ni lo. ZPM-in harsatna a tawh theih dan tur hisáp rànin inthlan hi MNF sorkar hian hmanhmawh takin a buatsaih niin kan hria," a ti a; registration certificate thil tel phûtna chu sût turin SEC an dil tur thu a sawi.

Lalliansawta chuan, ruling party MNF-te'n VC/LC candidate an zawnnaah, an mi duh zawng nawrna atan an lamhnai sorkar hnathawkte ṭawng chhanah an hmang nasa tih a sawi a, "An chhungte sorkar hnathawkin sorkar kut an tuar mai ang tih an hlauh vanga candidate hnar ngam lo, tui lo chunga ding turte pawh an awm tih kan hria. Hetiang em ema politics chhia leh tenawm hi Mizoramah a la thleng ngai lo a, a pawi tak zet a, tun hnuah thleng tawh ngai lo se kan duh," a ti.

September 1, 2020-ah Assembly session a awm dawn tih sawiin Lalliansawta chuan, "Chhàn loh theih loh zawhna te, sawiho loh theih loh resolution-te a awm leh ang. Mipuite'n tapchhak záwl 

aṭangin TV-ah kan lo thlir leh dawn a ni. Sorkar hian Assembly session hi a huphurh ngawih ngawih avangin, VC/LC inthlan pawh hi Assembly session hma ngeia neih ngei a duh a ni," a ti a; MNF sorkar chu khuarel chhiatna vanga mipui harsatna tawh mek hmu pha loah a puh.

ZPM President sawi danin, 15th Finance Commission chuan 2020-2021 report-ah, Mizoram VC-te pualin sum cheng vbc. 93 a dah hrang a, state sorkar zenpui theih loh turin, khaw tin chan tur pawh ṭhen fel vek a ni. State sorkar pawhin State Own Tax Resources (SORT) aṭangin 15% chu VC-te insem turin a dah ngei tur a ni bawk. Hei vang hian ruling VC nih vanga hamṭhat fàl bikna tur a awm tawh lo. Zawhna chhángin ZPM hruaitute chuan, SEC chu autonomous body ni mah se, anmahni ruattu state sorkar duh dan anga a kal ṭhin thu an sawi a, "ECI pawh anmahni ruattu central sorkar duh danin an kal tho," an ti.