Sikserh beihpui thlak dan tur sawiho

Chawngtea CADC Art & Culture Hall-ah June 9, 2023 zan khan Chakma Autonomous District Council (CADC) hotu te, khawtlang hruaitute leh tlawmngai pawlte pualin sikserh (malaria) chungchang leh sikserh do beihpui thlâk dan tur zirhona buatsaih a ni a, Health & Family Welfare minister Dr R Lalthangliana'n a hmanpui.

Health Minister chuan, sikserh chu hriselna lama Mizoram dinhmun hnuk hniamtu pakhat a nih thu sawiin, "Hei vang hian nasa takin sikserh donaah ṭan lak a ngai. Sikserh vanga sum tam tak sèn ralna leh thihna hial thleng ṭhin tibo turin mipui ṭan rual a pawimawh," a ti a, ṭanrualna nen Mizoram aṭangin sikserh ûmbo thuai theih a beisei thu a sawi.

Mihring cheng zat aṭanga tehin Mizoram hi India rama sikserh vei tamna ber state a ni a; Mizorama district zingah Lunglei, Lawngtlai leh Mamit district-te chu sikserh hluar zualna district a ni.

Zirhonaah hian Lunglei South bialtu MLA Dr K Pachhunga leh CADC chief executive member Rasik Mohan Chakma te, CADC-a elected member te, CADC leh state sorkar hotu te, kohhran leh khawtlang hruaitu te, tlawmngai pawl aiawhte an tel a ni.