Minister-te'n pass lawmna an hmanpui

Minister R Lalzirliana chuan June 9, 2023 khan a biala Thingsulthliah Higher Secondary School-in kumin HSSLC exam-a an zirlai pass tharte chawimawina leh zirlai tharte lawm luhna a hmanpui. Minister Lalruatkima pawhin June 9 zan khan a biala Dinthar Local Council leh YMA buatsaih HSLC leh HSSLC pass tharte leh Dinthar tihmingṭhatute chawimawina a hmanpui bawk.

R Lalzirliana chuan, zirlaite chu ram hruaitu la ni turte an nih thu sawiin, "Sikul uniform in hâk loh hnuah pawh mahni invawng tlatin, thiamna zau zawk neih tum zel ang che u," a ti a; Mizo tlawmngaihna lan chhuahtira vawng nungtu ni zel tur te, mi dangte tana malsawmna nih tum tur te, rinawmna, chhelna, taimakna, thuawihnate neih tum turin a fuih.

Mizoramin all India leh central service-a inziak tling a neih lohna a rei tawh tih sawiin Minister chuan, "Mizoramah lungawi mai loin, central service lamah in ngaihtuahnate sêng ang che u," tiin a chah a; Thingsulthliah HSS result lawmpui nan laptop leh projector a pek tur thu a sawi bawk. Thingsulthliah HSS hi kum 2004-ah din a ni a, zirlai 150 an awm mek a ni.

Dinthar venga HSLC leh HSSLC pass thar te, hna hmu tharte leh veng tihmingṭhatute chawimawinaah minister Lalruatkima chuan, zirlaite chu taima turin a chah a, "Thiamna sang chak takah inelna pawh a sang chak a, tih tak zetna leh taimakna tel lo chuan hlawhtlinna tak tak a chan theih loh," a ti a; AMC deputy mayor R Thanglura'n thu a sawi bawk.

Lawmpuina inkhawmah hian Dinthar veng mi, kumina HSLC pass mi 82 leh HSSLC pass mi 91 te, Florence Nightingale Award dawngtu Zopari te, fiamthu thiam H Rotluanga leh gazetted officer-a tling tharte hnenah chawimawina thilpek hlan a ni.