Minister-in Lungleia in sak mek a enfiah

Minister Dr R Lalthangliana chuan June 10, Inrinni khan Lunglei khawpuia hmasawnna ruhrel din mek, Kendriya Vidyalaya School leh Market & Trade Centre sak mekte a tlawh a; hna thawktute chu ṭha taka hna zo tur leh harsatna an neihte a hnenah thlen thuai ṭhin turin a chah.

Minister hian Lunglei Kendriya Vidyalaya principal Jitendra Kumar Meena leh MAMCO junior engineer ST Lalthanzauva te chu hna kal mek dinhmun leh hmachhawpte a sawipui a; Kendriya Vidyalaya chu India rama zirna ṭha leh hmingthang a nih thu sawiin R Lalthangliana chuan, zirlai tam zawk an inziah luh thuai theih nan project chu uluk takin thawk tur leh hun tiam chhung ngeia sak zawh a nih theih nan hma la turin a hrilh.

Kendriya Vidyalaya tihchangtlun hna hi sorkar laipuia Ministry of Human Resource Development kaltlangin kum 2018 khan cheng nuai 2,385.37 ruahman a ni a, Mizoram Agriculture Marketing Corporation (MAMCO)-in tihchangtlun hna an thawk mek. Hna thawh tur zinga 90% zawh a ni tawh a, August 2023 chhungin zawh hman beisei a ni.

Kendriya Vidyalaya-ah hian pawl 1-10 thleng zirna a awm a, zirlai 250, zirtirtu 14, contract zirtirtu pali leh non-teaching staff paruk an awm mek. Hna thawh zawh a nih hunah zirlai 1,500 vel leng tura beisei a nih thu sikul hotute chuan an sawi.

Lunglei Market & Trade Centre tur chu North Eastern Council aṭanga hmuh cheng nuai 1,403.40 hmangin sak mek a ni a; Contractor chu Lalzothanga, Maubawk, Aizawl niin, August 25, 2024-ah zawh hman tur a ni. Centre-ah hian dawr 339, car 30 leh two wheeler 71 dah theihna parking, police beat post, market office, inthiarna 34, kudam, bawlhhlawh dah khawmna, leh thil dangte awm tura ruahman a ni.

Dr R Lalthanglian chuan, Lunglei Market & Trade Centre chu Lunglei district tana hmasawnna tur pawimawh ber zinga mi a nih thu sawiin, "Lunglei economy tana pawimawh tak la ni zel tur a ni a, a bul ṭanna aṭangin uluk leh fimkhur taka hna kalpui a ngai," a ti a; PWD hotute leh contractor chu hmanraw ṭha hmang tur leh harsatna an neihte a hnenah thlen thuai ṭhin turin a chah bawk