KHAWTHLIR

Thisen pe

June 10, Inrinni khan YMA, Venghnuai Branch chuan YMA Day pual leh YMA football-a an champion lawm nan ZMC blood bank tan thisen unit 62 an pe a, petute mipa 48 leh hmeichhia 14 an ni. KṬP, Sihphir Branch-in Synod Hospital tan unit 20 an pe bawk a, petute mipa 14 leh hmeichhia paruk an ni.

Silai mu man

Assam Rifles sipaite chuan June 10, Inrinni khan Lalhupmanga (25) s/o Keithuanthanga, Zokhawthar nia inchhál hnen aṭangin Champhai Zotlangah Zokhawthar-Aizawl maxicab aṭangin silai mu 351 an man. SIlai mu an mante leh a kawltu chu Champhai Police Station-ah an hlan a ni.

Filling station thar

Supply minister K Lalrinliana chuan June 10, Inrinni khan Bairabi North-a Lalbiakzuala Filling Station thar a hawng. Minister chuan, oil depot changtlung zawk siam a nih theih nan sorkarin hma a lak mek thu a sawi. He filling station-ah hian HPCL diesel litre 35,000 leh petrol litre 20,000 dah theih a ni.

ISHTH Campaign

Lunglei District Jail leh inkhunghranna home hrang hranga awmte hri inkai chhàwn theihte laka invenna tur beihpui thlâkna - Integrated STI, HIV, TB and Hepatitis (ISHTH) Campaign chu June 10, Inrinni khan DC conference hall-ah Lunglei additional DC Liansangzuala Chhakchhuakin a hawng. Campaign hi District Jail bakah, home leh inenkawlna hmun thlan chhuah pariatah thla khat chhung kalpui tura ruahman a ni.

Dy. Chief Minister-in lehkhabu tlangzarh

Ex-MNA Col. Lalrawnliana lehkhabu ziah 'Ramhnuai Mi - An Autobiography' tih chu June 10, Inrinni khan dy. chief minister Tawnluia'n Dawrpui Multipurpose Hall-ah a tlangzarh. Tawnluia chuan chuan lehkhabu ziaktu Col. Lalrawnliana chu ramhnuai sipai huaisen, hnam sipai tangkai, raldonaa sulsutu a nih thu leh mahni inthunun thei bik a nih thu a sawi.

Dincham lawm

Lalvunga Battalion, Mizo National Army chuan June 10, Inrinni khan an dincham vawi 56-na KV Resort , Durtlangah an lawm a, an hun hmanpuitu MNF treasurer K Vanlalauva chuan, nationalism thinlung pua engpawh an tih zel chuan, hlem­hletna leh thil dik lo hian hmun a chang thei lo nia sawiin, "Midangte tana malsawmna a keng tel zawk a ni," a ti.

Thing tiak phun

Tribal Research Institute, Kelsiha thawk­tute chuan June 9, 2023 khan Green Mizoram Day pualin thing phun hnatlang an nei a, Social Welfare minister Lalrinawma'n a hmanpui.

Hmalakna enfiah

Sorkar laipuia Agri­culture and Farmers Welfare department joint secretary Franklin L Khobung, Central Nodal Officer for Jal Shakti Abhyan- Catch the Rain 2023 ni bawk chuan June 9, 2023 khan Siaha a tlawh a; sorkar hotute nen an inkawm bakah, Noaotlah-III khuaa Jal Shakti Abhyan hnuaia hmalaknate a enfiah a ni.