MZU exam hun sawn hlat a ni

Mizoram University (MZU) hotute nimina ṭhukhawm chuan, under graduate (UG) final semester (final year) exam, vawiina ṭan tura tih tawh chu sawn hlat an rêl.

MZU controller of examination-in nizana thuchhuah a siamah August 10-14 chhungin UG even semester exam neih a ni dawn lo a, hemi chhunga exam tura tihte chu September 3 hnu lamah an sawn.

August 10-14 chhunga professional course - LLB, BSW leh BBA-te exam tur pawh sawn hlat a ni a; MCA leh BCA exam erawh August 10-ah ruahman lawk anga kalpui tur a ni ang.

Nimina Higher & Technical Education (HTE) minister Dr R Lalthangliana hoa meeting chuan MZU hnuaia UG leh PG final exam tura ruahmanna siam tawh chu sawn hla (postpone) turin thuràwn pek an rél a ni. Mizoram Principals' Council chuan nimin khan MZU Controller of Examinations hnenah lehkha thawnin, vawiina ṭan tur under graduate (UG) final semester exam chu ennawn turin an ngen.

MZP pawhin exam hun sawn turin MZU Vice Chancellor hnenah nimin khan an ngen a; Mizo Students Union (MSU) leh Aizawl City College Joint Student's Union (ACCJSU) pawhin MZU hnuaia exam hi Covid-19 léng vangin ṭhulh turin MZU an ngen a, zirlaite chu exam lo turin an chah bawk.