Zo hnahthlakte thlavâng hauhna hun June 23-ah hman a ni dawn

NGO Coordination Com­mittee chuan Manipur tual­chhung buaina nasa taka tuartu Zo hnahthlakte thlavang hauh nân June 23, 2023 chawhma dar 11 khian Raj Bhavan gate bulah hun hman an tum a, Mizo zawng zawng tel turin an sáwm.

Nimin khan Central YMA Committee Room-ah NGO Coordination Committee an ṭhu­khawm a; Manipur tualchhung buaina vanga Zo hnahthlakte'n in leh lo chán a, harsatna nasa tak an tâwk mek chu pawi an tih tak zet thu an tarlang a ni.

NGO Coordination Com­mittee chuan, "An tawrhna hrang hrangte kan tawrhpuina lantirna tur leh an thlavâng hauh nan June 23, 2023 (Zirtawpni) chawhma dar 11-ah Raj Bhavan hmar lam gate bulah thlavâng hauhna hun hman kan tum a, Mizo zawng zawng tel vek turin kan insáwm a ni," an ti.

District hrang hrangah YMA sub-headquarters-te leh Young Lai Association leh Mara Thyutlia Py-te chu pawl dangte phungbawma sáwma hun lo hmang vek turin an ngen bawk.

Nimin tlai dar 5 thleng khan Manipur buaina avangin Mizoramah raltlan 10,808 an awm mek. Raltlan awm tamna ber Kolasib district-ah chuan mi 3,834 an awm.

Raltlan eng emaw zat chuan CYMA-in an lo chawlh lailawkna tura a siam (transit camp) camp an pan phawt a, chumi hnuah Mizoram pawna an chhungte bêl turin an kal leh ṭhin. A ṭul angin CYMA-te chuan an buaipui a ni. CYMA hian an office chu transit camp-ah an hmang.

Belh tur nei lote chu Aizawl khawpui chhunga branch YMA hrang hrangte'n transit camp aṭang hian hruai chhuakin, an mikhual a ni.

Transit camp-ah hian mi 220 an lut tawh a, chung zinga 189 chu branch YMA-ten lain, nimin tlai thleng khan camp-ah hian mi 31 an awm.