ZPM in vote hian eirûkna in do a ni - Vanneihtluanga

ZPM party chuan nimin khan Aizawla an pisaah chhung inkhawm an nei a, ZPM star campaigner Vanneihtluanga'n thu sawiin, ZPM party aṭanga MLA din tum zingah eirûk tumna rilru pu an awm chuan ZPM-ah an len loh thu a sawi a, "ZPM in vote hian eirukna in do a ni," a ti a, ZPM mite chu an sorkar avanga rethei telh telh ngam turin a chah.

Vanneihtluanga chuan, "MLA din tum zingah, kan hotute zingah eiruk tum kan awm em, chutiang rilru pu kan awm chuan ZPM báwmah hian kan leng lo, kan telna tur a ni lo tih i hria ang u. ZPM vote tur zawng zawng ka hrilh duh che u chu, ZPM in vote hian eirûkna in do a, dikna leh rinawmna in vote dawn a ni," a ti.

Mizorama political party zingah ZPM chu beiseina sanna ber a nih thu sawiin Vanneihtluanga chuan, "Thli hi khawi aṭangin nge a lo kal kan hre lo, kan thawhrimna leh thawh nasat vanga heng hun hi thleng kan ni lo, Pathian a che a ni," a ti a; Zoram ṭha zawk siam turin ke an pên tih a sawi.

Vanneihtluanga chuan, ZPM a din aṭangin thil pakhat duh loh em em an nei tih sawiin, "Mahni party mi ni lo sawisel ngar ngar, mahni party voh vak a, mi dang party sawichhe thiam em emte hi kan duh lo," a ti a; mi dang ṭhat lohna sawi ngawr ngawr an duhlo tih sawiin, "Mahni party fak chiam te, kan fel lohna an sawi apianga chhàn chhânte hi ZPM hian kan ti ngai lo. Chutiang mei chu kan zu ve ngai lo a ni. Kawng hrang hrangin min chirhtheh mahse kan chháng vek dawn lo," a ti.

Party kal tawhte a páwng a puiin an sawisel lo nia sawiin, "Thli neitu hian dikna leh rinawmna thli a tlehtir a, chu thli chu mipuiin min hmehbel mai a ni. Mipui hian ZPM sorkartir hi an tum ber a ni lo, Zoram ṭha zawk siam turin ZPM hi min beisei mai chauh a ni zawk,” a ti a; dikna leh rinawmna bosal zawnga an chêt chuan thli neituin a chhêm khûm daih theih thu a sawi.