"Kan rama boruak ṭha leh thianghlim hi sum thawh chhuah nan kan hmang thei" - EFCC Minister

Environment, Forest and Climate Change minister TJ Lalnuntluanga chuan nimin khan Mualpuia Govt. Aizawl College conference hall-ah Green GAC Day a hawng. Minister chuan, Mizoram boruak ṭha leh thianghlim chu sum thawh chhuah nan hmang theih a nih thu leh carbon credit hmangin hmasawnna tur sum thawh chhuah theih a nih thu a sawi.

EFCC Minister chuan, carbon credit hmangin sum thawh chhuah theih a nih thu sawiin, "Kan rama boruak ṭha leh thianghlim hi sum thawh chhuah nan kan hmang thei a ni tih hria a, khawvelin a buaipui em em carbon credit hmangin ram hmasawnna tur sum kan thawk chhuak thei a ni," a ti.

Tlawmngai pawl, ṭhalai leh zirlaite thinlungah thing phun pawimawhzia a thawk ná tih sawiin Minister chuan, "Mizoramin hma pawh a sawn nasa a, thing leh mauin a khuh ram 84.5% kan nei ta. Vawiina GAC campus-a thing phun hian rah ṭha tak chhuah se, kan thing phunte enkawl zui a, awmze neia phun a ngai a ni," a ti a; Aizawl châwm tur boruak ṭha siam turin thing phun uar zel tur leh enkawl zui turin zirlaite a sáwm.

GAC principal Lalbiakzuala pawhin thu sawiin, an thing phunte chu enkawl zui a nih tur thu leh chumi tur chuan NCC-te'n mawh an phurh dawn thu a sawi.

Green GAC Day-ah hian thing chi hrang hrang 200 chuang phun a ni dawn a, nimina a hawnna inkhawm zawhah EFCC Minister hian college ram chhungah thing a phun nghal a ni.

GAC campus-ah hian zirlai 2,260, zirtirtu 60 leh thawktu dang 20 vel an awm a, Mualpuia an hmun thar hi kum 2021 khan an luah ṭan a ni.