Kolasib Blood Bank-a thawk tur pakhat Minister-in MLA fund hmangin rawih tum

Minister K Lalrinliana chuan nimin khan a bial chhunga Kolasib-ah North East Special Infrastructure Development kaltlanga khum 100 awm theihna tur District Hospital sak mek a tlawh a; District Hospital Blood Bank-a thawktu indaih lohna phuhrûk a nih theih nan MLA fund hmangin thawktu pakhat ruahman nghal a nih tur thu a sawi.

K Lalrinliana chuan, Kolasib District Hospital sak mek chu a nih dan tur ang taka sak a nih theih nan PWD-a thawktute'n uluk taka an vilpui a ṭul thu leh hmanrua hman leh a sak danah duhthusam lohna lai a awm chuan ennawn a, a ṭul anga siamṭha vat ṭhin turin thawktute a chah a, "District Hospital Blood Bank-a thawktu indaih lohna phuhrûk a nih theih nan MLA fund hmangin thawktu pakhat ruahman nghal a ni ang," a ti.

Minister hian dialysis building, blood bank, laboratory leh ward hrang hrang a endik a; District Hospital-in bawlhhlawh tihral kawnga harsatna an neihte thawktute nen an sawiho nghal.

Laboratory-ah thyroid function test kalpui theihna tur khawl bun a nih theih nana hmalak dan tur sawiho a ni a, bawlhhlawh hâl ralna hmun hman chhunzawm theih a nih tawh loh avanga District Hospital-in harsatna a tawh mek sutkian a nih theih nan June 14, 2023 hian UDPA department hotute nen sawiho an rêl.

K Lalrinliana hian District Civil Supplies Office leh Supply kudam a tlawh bawk a, buhfai dinhmun a enfiah. National Food Security hnuaia chhawngkaw tinin chanvo an neihte dik taka pek chhuah a nih theih nan ṭhahnemngai taka thawk zel turin thawktute a chah.

Dumluia Chakai Farm a tlawhnaah district fisheries officer Lallianpuii chuan, farm chu chawlhkar tin an vilpui thu Minister a hrilh a; tun dinhmunah farm-a tuikhuah eng emaw zatah chakai an inthlah pun tawh thu leh hrisel takin an enkawl mek thu a sawi bawk.