PE Minister-in ram inthleng tum a enfiah

Power & Electricity minister R Lalzirliana chuan nimin khan 132 KV Sub-Station, Kaihlet, Melriata PE department ram leh vantlang ram inthlengpui tura Melriat VC leh NGO-te dilna a hmunah a enfiah a; khawtlang tana ṭha, ṭangkai leh chhawr tlak hmasawnna thlen chu sorkar duh ber a ni tih a sawi.

R Lalzirliana chuan, sorkar chu mipui tana ding a nih angin mipui hamṭhatna turah theihtawp a chhuah ṭhin tih a sawi a, "Melriat khawtlangte'n 132 KV Sub-Station-a thawktute chenna staff quarters tura ram an lo pek tawh chu sorkarin a theihnghilh lo. Vantlang mamawh em em infiamna hmun tur in neih theihna tura 132 KV ram leh khawtlang ram inthleng in dil hi sorkarin a ngai pawimawih hle a ni," a ti.

Ram inthleng turin Cabinet pawmpuina a ngai tih sawiin Minister chuan, dawhthei taka nghak tur leh Cabinet meeting-ah theihtawpa bawhzuiin, a hlawhtlin ngei a beisei thu a sawi a, "Khawtlang tana ṭha, ṭangkai leh chhawr tlak hmasawnna thlen chu sorkar duh ber a ni," a ti a; beiseina nen lo nghak turin a chah.

PE Minister ṭawiawmtu bialtu MLA Prof. F Lalnunmawia chuan, Melriat khawtlangin infiamna hmunhma ṭha an mamawh tih a hriatpui thu sawiin, a hlawhtlin ngei theih nan theihtawp chhuaha hmalakpui a tum thu a sawi.