Clean Lunglei kum 10 tlin lawm a ni

Nimin khan Lunglei Convention Centre-ah Clean Lunglei kum 10 tlin lawm a ni a, minister C Lalrinsanga, Lunglei West bialtu MLA-in a hmanpui.

Inkhawm hi Clean Lunglei chief organiser C Lalhmingmuana'n a kaihruai a; C Lalrinsanga chuan, Clean Lungleiin châwl loa kum 10 chhung faina leh bawlhhlawh sawngbawl chungchangah Lunglei mipui an zirtir leh ṭhanharhna an thlen chu lawmawm a tih thu a sawi a, "Tuna kan kal chinah chuan hmasawn tawh tak kan ni. Kan ṭawngkam hmanah pawh fimkhur ila, ṭawngkam ṭha leh mawi kan chìn ṭhan a ngai a ni," a ti.

C Lalrinsanga chuan, faina leh thianghlimna chu zirlai naupang aṭanga zirtir a ngaih thu a sawi a; bawlhhlawh paih kawngah la ṭhangharh lo mi tam tak an awm tih sawiin, hma la chhunzawm zel turin Clean Lunglei hotute leh kal khawmte a chah.

Inkhawmah hian Lunglei High Powered Committee vice chairman Lawmawma Tochhawng, Lunglei East bialtu MLA pawhin thu a sawi. Clean Lunglei kum 10 tlin lawmna puala essay, slogan, mobile photography intihsiak lawmman leh Lunglei tana faina kawnga hma la ṭha mi pahnih hnenah chawimawina hlan a ni.

Lalsanglura, Rahsi Veng leh Lallianpuia, Salem Veng hnenah special award hlan a ni a; intihsiaknaa pakhatnate chu - essay inziahsiakah Lalrothanga Chhakchhuak, Baptist HSS leh Lalhmangaihsangi, Lunglei College, slogan inphuahsiakah Salem Veng VC leh, mobile photography-ah C Lalruatfela, Electric Vengte an ni.

Clean Lunglei hi July 12, 2013-ah din a ni a, sanitation volunteer din niin, khawpui tihfai hnatlang, hmun bik tihfai hnatlang, bawlhhlawh báwm sem leh bawlhhlawh hâlna siam, school leh college-a awareness campaign buatsaih, TV-ah talkshow-te an buatsaih a, khawpui hmun hrang hrangah signboard/hoarding an tár bawk.