Thil chîk mite'n Congress rintlak an ti; Mizoramah kan sorkar dawn - Lalsawta

Tuirial Block-II Congress Committee chuan nimin khan Khawkunga Hall, Bukpuiah political training an buatsaih a, an hun hmanpuitu Congress party president Lalsawta chuan, thil chîk mite'n Congress party rintlak an ti nia sawiin, Mizoramah mi ṭha tak tak candidate an neih dawn avangin an sorkar dawn niin a sawi.

Lalsawta chuan, ram tana thawk an nih avangin minister-te leh MLA-te chu rethei tur an ni a, hausa tur chu an rawngbawlsak tur mipui an nih thu sawiin, "Ṭang puihna leh sorkar ṭha hmangin kut hnathawktute kan chawi chhuak dawn. Ram leh mipui hmang hian kan ram hi hmasawntir kan tum a ni. Mi thil chîk mite'n Congress party an rawn zir a, rintlak an ti. June thla chhung hian inlawm luh rûnpui kan nei dawn," a ti.

India rama thil chîk mite'n kum 2024-a Lok Sabha inthlanpuiah Congress party-in sorkarna an chang turah an ngai nia sawiin Lalsawta chuan, "Tun hnaiah Karnataka-ah sorkar tura seat 113 kan mamawh laiin seat 135 lai kan la. Mizoramah pawh ram leh hnam hmangaihtu, kan ram tana ke rawn pên chhuak tur mi ṭha tak tak candidate kan neih dawn avangin kan sorkar dawn," a ti a, party dang angin candidate-ah buaina an nei ve dawn lo niin a sawi.

MPCC President chuan, 'Sum ngah ngah hmelṭha' tiin Mizoram chu ram hrehawmah an siam tur a ni lo tih sawiin, "Sum thil tih theihna hi kan chhu chat tur a ni. Inthlannaa sum hman kan hneh ngei tur a ni. Hei hi kohhran leh MPF duh dan a ni. Pathian leh a kohhrante duh dan anga kan kal dawn avangin anni pawhin min pui ngei ang," a ti.

MPCC treasurer Dr Lalmalsawma pawhin thu sawiin, "Ṭang puihna hmangin kut hnathawktute dinhmun chawi kâng turin kan inbuatsaih mek a, Mizoram hi siam danglam kan tum. Congress party-in sorkar ṭha kan siam tur hi mipui náwlpuiin an chhawr dawn. Tuna kan sorkar hrawn mek erawh mi tlemtê bakin an chhawr lo," a ti a; mipui náwlpui ban phak, miretheite khai chhuaktu tur sorkar Lalsawta hoa din an tum thu a sawi.

MPCC thuchhuah chuan, inkhawmah hian MPCC President-in Tuirial Block-II huam chhunga khaw hrang hrang aṭangin mi 15 Congress party-ah a lawm lut niin a tarlang.