Zoramthanga anga hruaitu ṭha Mizo hnamin a nei lo - Lalruatkima

MNF adviser Lalruatkima chuan, Zoramthanga anga hruaitu ṭha Mizo hnamin a nei lo nia sawiin, hun harsaa Mizoram leh hnam enkawl turin Pathianin Zoramthanga sorkar a ring tâwk niin a sawi.

Nimina Awithangpa Hall, Kawnpuia Tuirial West Block MNF Conference-ah thu sawiin Lalruatkima chuan, "Zo fate'n hnam anga beih kan tawh mek lai hian Pu Zoramthanga anga leader ṭha Mizo hnam hian a nei lo. Hmun hrang hranga awm Zo fate ṭahna hi kan ṭahna a ni a, an tan kan ding tlat zel dawn. Hnam tana silai lek ngam, martar tam tak awm tawhna party, ramri humhalh tura silai hmet puak ngam hi hnam chhan turin kan duap dui lo ang," a ti.

Lalruatkima chuan, MNF-te chu fing ber leh ṭha ber leh sawisel kai lo an ni lo tih sawiin, "He ram hi kan kutah Pathianin a dah. Covid hripui, ramri buai, vawk pûl, lirnghing leh ráltlân lo thleng tur hre lâwk Pathian hian hun harsaa he ram leh hnam enkawl tur hian Pu Zoramthanga sorkar hi a ring tâwk a ni," a ti a; MNF sorkarin an manifesto an tihhlawhtlin a tam tawh hle niin a sawi.

Inkhawmah hian Lalruatkima hian MNF party-ah mi 651 a lawm lut niin MNF thuchhuah chuan a tarlang a; Tuirial bialtu MLA K Laldawngliana pawhin thu a sawi a ni.