Minister-in Mission Shakti a hawng

Social Welfare & Tribal Affairs minister Lalrinawma chuan nimin khan Administrative Training Institute (ATI) auditorium-ah hmeichhiate hleilenna laka venhimna leh chhawmdawlna tur Mission Shakti a hawng.

Social Welfare Minister chuan, hmeichhe dinhmun chawi kâng turin mi tin an pawimawh tih sawiin, "Hmeichhiate'n an chanvo an chan thei nan dâwm kân leh rahbi siamsak hi kan tih mâkmawh a ni," a ti.

Lalrinawma chuan, sorkar laipuiin hmeichhe dinhmun a ngaih pawimawh em avangin scheme ṭha tak tak a kalpui mek tih sawiin, "Mission Shakti pawh hian hmeichhiate'n hleilenna an tawrhna lakah nasa takin venhimna leh chhawmdawlna a pe dawn a ni," a ti a; Mission Shakti a hlawhtlin theih nan department hotute leh thawktute chu theihtawp chhuah turin a fuih.

Inkhawmah hian kumin HSSLC exam-a hmeichhia topper-te hnenah lawmpuina thuziak hlan a ni a; hmeichhia leh naupang ṭanpui ngaite tan phone number 181 leh 1098-ah engtik lai pawhin biak theih reng a nih thu tarlan a ni.

Mission Shakti hnuaiah hian state level-ah State Hub for Empowerment of Women State level-ah a awm a, district tinah District Hub for Empowerment of Women a awm bawk.