Sorkarah rinawmna hmuh tur a awm lo - BJP Vice President

BJP vice president R Vanramchhuanga chuan, 'nghah loh dawr' avangin hnam dangte'n Mizote chu hnam rinawm anga an hriat laiin, rinawmna chu Mizoram sorkarah hmuh tur a awm lo niin a sawi.

R Vanramchhuanga hian nimin khan Mizoram BJP pisaa inkhawmah thu sawiin, "Ram dangin Mizoram min hriat dan lawmawm tak pakhat chu 'nghah loh dawr' a ni a, chu chuan Mizote rinawmna a tarlang. Nimahsela, kan rinawmna chu kan state sorkarah kan hmu lo niin a lang thung a, a chhan chu kan state development kan neih dan en hian a chiang a ni," a ti.

BJP Vice President chuan, pastor-te leh rawngbawltute'n pulpit aṭangin BJP beihna leh politics chungchang an sawi fo nia sawiin, "Sorkarna chelh apiang na tak takin an sawisel fo ṭhin. Nimahsela, rawngbawltu kan tihte hian Pathianin a koh angin rawngbawlna an kalpui em? Kan hna kan thawk ṭha em? Thlarau bo Pathian hnenah kan hruai em? Thlarau bo engzat chiah nge kan man tih hi zawhna lian tak mipui thinlungah a awm a ni," a ti a; ram rawngbawl tura inpe politician leh kohhran rawngbawl tura inpete'n an tih tur ṭheuh an tih leh tih loh inenfiah a ngaih thu a sawi a ni.