KHAWTHLIR

Hnahthial DIET

School Education minister Lalchhandama Ralte hoin nimin khan sorkar official-te'n Hnahthiala District Institute of Education and Training (DIET) dinna tur ram an thlirho. DIET building sakna tur hian mi pangain a thàwnin ram an pe phal a ni. DIET building sakna tur hian Samagra Shiksha hnuaiah Project Approval Board chuan cheng nuai 437 a pawm tawh a ni.

Ran enkawl zirho

Agriculture director James Lalsiamliana, Green-Agriculture Project state project director ni bawk chuan nimin khan Agriculture directorate-ah Green-Ag Project hnuaia hmalakna pakhat - Curriculum Development Workshop on Livestock Management a hawng. Zirhonaah hian Dampa-Thorangtlang Landscape (Lunglei & Mamit district)-a Green-Ag Project high priority villages 17-a chêngte'n hlâwk leh ṭha zawka an vawk leh ar vulha an enkawl theih dan tur training module buatsaih a ni.

EVM enfiah

Champhai DC pisaa FLC Room-ah nimin khan MLA General Election 2023 neih tura inpuahchahna kal zelah electronic voting machine leh voter verifiable paper audit trail (VVPAT) khawlte endik ṭan a ni a, vawiinah political party aiawhte'n vote thlak chhinna, mock poll an nei ang. EVM-a control unit leh ballot unit leh, VVPAT-te chu ECIL siam a ni a, ECIL engineer-te'n an endik a ni.

Thuthlung ziak

Labour Employment, Skill Development and Entrepreneurship department, National Skill Development Corporation leh Medhavi Skills University-te chuan June 9, 2023 khan Bawngkawn Chhimveng Hall-ah Mizoram International Centre for Innovation & Skills Excellence dinna turin thawhhona thuthlung an ziak. MoU-ah hian LESDE secretary Lalramsanga Sailo, NSDC chief executive officer Ved Mani Tiwari leh Medhavi Skills University pro chancellor Kuldip Sharma ten hming an ziak a ni.