Kar khat chhungin hripui vei Mi 146 hmuh chhuah a ni Truck enkawltu 39-in an kai

Mizoramah chawlhkar liam ta chhung khan Covid-19 hripui vei hmuh chhuah thar mi 146 an awm. Nimin tlai dar 5 thleng khan Kolasib district-a táng mek truck driver leh handyman zingah hripui vei mi 39 hmuh a ni tawh bawk. August 8-a hripui vei hmuh chhuah zingah swab sample latute zinga mi doctor a tel.

Nimina Kolasib district-a truck driver leh handyman-te swab test result chawhma lama tihchhuahah, Covid-19 vei mi 15 hmuh chhuah belh a ni a, Assam mi 14 leh Rajasthan mi pakhat, mipa kum 17- 52 inkar an ni. Sorkar thuchhuahtea a lan danin, Seṭhawn leh a chhehvela truck táng driver leh handyman-te August 6 zan aṭanga Rapid Antigen Test hmanga endiknaah nimin chawhma thleng Covid-19 vei mi 39 hmuh chhuah a ni tawh a, an vaiin Dedicated Cocvid Health Centre dah nghal zel an ni.

Nimin khan ZMC-ah Health department-a driver pakhat, Covid-19 vei hmuh chhuah a ni a, Mizorama mi dang aṭanga kai a ni. Nimin vêk khan Lunglei Civil Hospital laboratory-ah swab sample 20 endik zinga mi pangain hripui an vei tih hmuh chhuah a ni. An vaiin 131 battalion BSF sipai mipa kum 24-46 inkar, July 24, 2020-a Bihar, Haryana, Odisha, Punjab, leh Uttar Pradesh aṭanga rawn lut an ni a, Multipurpose Hall, Sazaikawna khung hran lai niin, symptom an nei lo.

August 8, Inrinni khan Covid-19 vei mi 28 hmuh chhuah a ni. ZMC-a  RT-PCR khawl hmanga mi 149-te swab sample endikah hripui vei mi 25 hmuh chhuah a ni a, Kolasib district-a RAT hmanga mi 497 endik zingah mi pathum hmuh a ni bawk. Inrinnia ZMC-a hripui vei hmuh thar mi 25-te hi mipa 22 leh hmeichhia pathum an ni a, Aizawl district-a mi 24 leh Lawngtlai district-a mi pakhat an ni. Lawngtlai district-a mi pakhat hi hmeichhe naupang kum 7 mi a ni a, harsatna a neih vanga endik niin, a nu aṭanga kai nia hriat a ni.

ZMC-a Covid-19 vei hmuh thar mi 25 zinga Aizawl district-a 24-te zinga pathum chu Mizoram páwn aṭanga rawn lut ni lo, hripui veite aṭanga kái chhâwng (positive contact) an ni. Mi pathum zinga pakhat chu Health department-a thawk doctor, swab sample laa kal chhuak ṭhin a ni a; harsatna a neih avangin State Referral Hospital (SRH)-ah admit sa a ni. Positive contact dang pahnih chu Mizoram police ve ve, BSF quarantine centre vengtute an ni thung.

August 8-a Aizawl district-a mi hmuh chhuah mi 24 zinga 17 chu BSF sipai, 24-44 inkar an ni a, sipai 17 zinga 15 chu Uttar Pradesh aṭanga lo kîr niin, Andhra Pradesh leh Rajasthan aṭanga lo lût pakhat ve ve an awm. An vaiin quarantine facility-a awm lai an ni a, Covid-19 symptom nei an awm lo. Mi pali dangte chu mipa leh hmeichhia pahnih ve ve an ni a, quarantine facility-a awm lai, symptom lang lo vek an ni. An zinga pathum chu Assam aṭanga rawn haw chhungkua an ni a, an zingah hmeichhe naupang kum 5 mi a tel. Mi pakhat erawh chu mipa kum 33 mi, tun hnaia Tripura aṭanga rawn haw a ni.

August 8 vêk khan RAT hmangin Kolasib-ah mi eng emaw zat swab sample endik an ni a, a tam ber chu Thingdawl leh Seṭhawn inkara NH-54 kawngpui chhia leh siam vanga tangkhang truck driver leh handyman-te niin, an zingah Covid-19 vei mi pathum hmuh chhuah a ni. Mi pathumte hi mipa kum 20-27 inkar, Assam mite an ni a, Covid-19 symptom an nei lo. August 7, Zirtawpni khan Covid-19 vei mi 27 hmuh chhuah a ni a, August 8, Inrinni khan Mizoramah Covid-19 vei mi 28 hmuh chhuah a nih bakah, nimin khan truck driver leh handyman zingah mi 15 hmuh chhuah leh a ni bawk.

Zirtawpnia ZMC laboratory-a swab sample 146 endik zingah Covid-19 vei mi panga - mipa pali leh hmeichhia pakhat hmuh chhuah a ni a, chungte chu kum 27-41 inkar, Aizawl district mi pathum leh Champhai district mi pahnih niin, state dang aṭanga tun hnaia rawn haw an ni tih SRH-ZMC Bulletin chuan a tarlang. August 7 vêk khan chhûn lamah Kolasib district lirthei tangkhang driver leh handyman-te Rapid Antigen Test (RAT) hmanga endiknaah Covid-19 vei mi pathum hmuh belh a ni a; chu'ngte chu Assam mi pahnih leh Meghalaya mi pakhat niin, mipa kum 20, 22 leh 25 mi an ni. August 7 zing lamah leh a hma (August 6) zana RAT hmanga endiknaah truck driver leh handyman zingah hripui vei mi 18 hmuh chhuah a lo ni tawh bawk.