Health minister hoa emergency meeting-ah Mitthi vui kalphung ennawn rawt
Tun hnaiah Mizoramah Covid-19 vei an pun tâk thut vanga Health & Family Welfare minister Dr R Lalthangliana hoa nimina SAD conference hall-a emergency meeting chuan, mitthi vuinaa inkaihhruaina chu en ṭhat leh an duh thu an rel.
Mitthi vuinaa mipui kalkhawm zingah contact tracing tih ngai awm ta se, harsatna a awm theih dawn avangin, chhiatni ṭhatni inkaihhruaina chungchangah YMA hruaitute leh kohhran hruaitute nen inràwn tlân nawn an rawt.
Swab sample test result nghâk mek tana inkaihhruaina Standard Operating Procedure (SOP) siam an rél a; ni tin mamawh phurtu truck driver-te bakah thlawhtheihna hmanga Mizorama lut ni tin mi 60-70 inkar leh Vairengte paltlanga lut mi 50 vel an awm ṭhin thu sawi a ni a, "Covid-19 positive an pun tâk hluai avangin ni tina lo lutte hi awmze neia khuahkhirh ṭulin an hria a, a ṭul anga hmalak ni se," an ti.
Chief secretary Lalnunmawia Chuaungo chuan, Independence Day 2020 lawmnaah National Anthem, Guard of Honour lak leh Chief Minister thuchah a awm dawn a, parade a awm dawn lo a, Governor’s At Home a awm dawn lo bawk tih a sawi.
Meeting-a an rêlte
# Rapid Antigen Test kit 10,000 lei belh tura hmalak.
# Vairengte-ah doctor leh lab technician 6 dah belh.
# SRH-ZMC ah Covid-19 vei ni lo, damlo dang admit loh.
# A hma tawnga thawk (frontline worker)-te tan ruahmanna (contingency plan) neih.
# Swab sample result nghakte tan inkaihhruaina (SOP) siam.
# Gymnasium leh infiamna hmun (sports complex) khâr tura hmalak.