Ramri chungchanga Mizoram sorkar thu thlenah Assam sorkar a la ngawi

Mizoram sorkarin Mizoram ramri china a pawm leh thil dangte Assam sorkara a thehluh chungchangah Assam sorkarin thu leh hla a la nei lo.

Vanglaini thu dawn danin, Mizoram sorkar chuan ramri china a pawm leh thil dangte March 2023 vel khan Assam sorkarah a thehlut tawh a, nimin thleng khan Assam sorkar aṭangin chhanna dawn a la ni lo. Hei vang hian Mizoram sorkar thu thlen an pawm leh pawm loh hriat theih a la ni lo a ni.

Assam aṭanga thu dawn la neih a nih loh avang hian Mizoram leh Assam ramri chungchangah Mizoram sorkarin hmalak zuina a nei rih lo a; Assam aṭanga chhanna hmuh a nih hunah an chhàn dan azirin hmalak zel dan tur ngaihtuah a ni ang.

Vanglaini palai zawhna chhangin Home secretary H Lalengmawia chuan, ramri chungchanga Mizoram sorkar ngaihdan an thlenah Assam sorkar chu an rin aia an ngawih rei tawh thu a lo sawi tawh a, "Kan thu thehluh an zir chiang ang a, eng emaw rawn sawi chu an neih ngei kan ring," a ti.

Home Secretary chuan, ramri chungchanga Assam sorkar nena inbiak leh hun tur hriat a la ni lo tih sawiin, "Kan thu thehluh min rawn chhànna aṭangin inbiak leh hun tur pawh a la hriat theih ang," a ti a, inbiak leh hun tur sawi a awm rih lo tih a sawi.

November 17, 2022-a Guwahati, Assam-a Mizoram sorkar leh Assam sorkar aiawhte inbiak ṭumin Joint Declaration-ah Mizoram sorkarin ramri china a pawm chhunga khaw awm te, a huam chin te, geo spatial extent te, a huam china chêngte hnam chanchin leh chi (ethnicity)-te leh chanchin dangte Assam sorkarah thehlut tura tih a ni.

Joint Declaration-ah chuan, "Heng chanchin thehluhte hi ramri buai chinfelna tura la din tur state pahnih aiawhte telna Regional Committee-in an enfel ang a, chanchin lâk khawm kawngah Assam sorkarin Mizoram hi a theihna apiangah a pui ang," tih a ni.

Inbiaknaa Assam team leader Atul Bora, Border Protection & Development minister chuan April 2023 thla tìr khan Mizoram sorkarin a thil phûtte an thehluh tawh thu a sawi a, "Rei tak Mizoram Home Minister kaihhruai Mizoram aiawhte nen kan inbe tawh a, tun ṭumah hi chuan eng emaw tak a thleng tawh ang," tiin a sawi.

Tarlan tawh angin, Mizoram leh Assam ramria Mizoram sorkar dinna chu Bengal Eastern Frontier Regulation, 1875-in a tarlan ang a ni.