Awithangpa Group YMA-in Myanmar ráltlân awmnaah Indian document an hmu chhuak

YMA, Awithangpa Group YMA chuan Myanmar tualchhung buaina avanga sahimna zawnga Khamrang khuaa awm mek zingah Aadhaar card nei mi pathum, Mizorama bank account nei pakhat leh PAN card nei mi pakhat an hmu chhuak.

Awithangpa Group YMA hian Khamranga awm Myanmar ráltlân mi 110 dinhmun zir chiang turin study team an din a, study team chuan May 6, 2023 khan zirchianna an ṭan a, an zirchianna leh sorkar hmalakna tur nia an hriatte chu nimin khan Kolasib DC hnenah an thlen a ni.

YMA, Awithangpa Group tarlan danin, Khamranga Myanmar raltlan awm zingah Aadhaar card nei mi pathum hmuh chhuah a ni a, Income Tax department hnuaia Permanent Account Number (PAN) card nei pakhat leh Federal Bank, Aizawla account nei mi pakhat hmuh a ni bawk.

Aadhaar card neite chuan Village: Khamrang, Sub District: Bilkhawthlir, District: Kolasib tiin an inziak a; pa hming ziak loin c/o an dah. Hetih lai hian, Khamrang VC leh YMA chuan an c/o te chu tute nge an nih an hre lo.

Raltlante chuan Aadhaar card siam turin Dawrpui venga mi pakhatin Solomon's Cave-ah a kalpui ṭhin a, document pakhat siamah Rs 8,000 zel an chawi ṭhin tih study team an hrilh.

Awithangpa Group YMA chuan, Aadhaar card siam turin birth certificate neih ngei a ngai tih sawiin, "Hei vang hian birth certificate pawh hmuh chhuah loh a awm ngei kan ring," an ti a; an study team-in an hmuh chhuah tawh bak pawh hmuh chhuah tur a la awm ngei an rin thu an tarlang bawk.

YMA, Awithangpa Group chuan an thil hmuh chhuahte Kolasib DC John LT Sanga hnenah an thehluh rual hian, Myanmar aṭanga ráltlân anga rawn chhukte'n Indian document pawimawh tak tak an neih theih dan chhui chhuak a, thil dik lo tite chu dan hmanga hrem tur leh an document-te tihtawp a nih theih nan hma la turin an ngen a, "YMA-in a hmuh chhuah theih loh document dang la awm theite pawh dap chhuak turin kan ngen," an ti.