Dan loa khaw din 13-ah hmasawnna hna kalpui lo turin sorkar department-te hriattir
Tlabung Sub-Division chhunga dan loa khaw din (unauthorised village) 13-ah hmasawnna hna leh sorkar scheme-te kalpui lo turin sorkar department-te hriattir a ni.
Nimin khan Lunglei additional DC Donny Lalruatsanga hoin DC conference hall-ah sorkar hotu te, khawtlang leh tlawmngai pawl hruaituten Tlabung Sub-Division chhunga dan loa khaw dinte laka hmalak dan tur an sawiho. Tlabung SDO (Civil) kaihhruaiin leh Khawthlangtuipui Group YMA hruaitute'n dan loa khaw dinte chu July 15, 2023 ral hmain tlawh chhuakin an dinhmunte zir chiang se, an tih bakah, dan loa khaw dinteah hmasawnna hna leh scheme-te kalpui lo turin sorkar department-te an hriattir.
YMA, Khawthlangtuipui Group chuan May 3, 2023 khan thuchhuah siamin, an huam chhunga dan loa khaw din 13 - Zohmun, Lare Veng, Letisury, Khojoysurychhuah, Bornasury, Chandobighat, Dursury, Saisen, Nakuksora, Gurusora, New Balukiasury, Balukiasury-chhuah leh Bandiasora a chengte chu June 14, 2023 hma ngeia an khaw pangngai (parent village)-ah lêt turin an hriattir a ni.
Donny Lalruatsanga chuan, dan loa khaw din chu sorkarin a ngaimawh nia sawiin, "Kum 2019 khan joint inspection team din niin, inspection chipchiar tak neih a ni a, Covid-19 leng vangin hmalakna tihtawp lailâwk a ni. Hmalakna uluk leh fimkhur taka kalpui zel a ngai a, mihring dikna chanvo bawhchhe loa kalpui a ṭul," a ti.
Ṭhutkhawmah hian Lunglei SP Rahul Alwal, DLAO Beitlotha Nohro bakah, sorkar department hrang hrang hotu te, Lunglei YMA Sub-Hqrs, Lunglei District Village Council Association leh Khawthlangtuipui Group YMA hruaitute an tel a ni.