Mobile ICTC Vehicle vailiam a ni; hmun 41-ah Stand Alone ICTC a awm

Mizoram State AIDS Control Society (MSACS)-in district pasariha hman tura a ruahman, Mobile Integrated Counselling & Testing Centre vehicle (Mobile ICTC vehicle)-te chu nimin khan Health & Family Welfare minister Dr R Lalthangliana'n New Capital Complex tualzawl aṭangin a vailiam. Mobile ICTC hmangin khaw tin hrût chhuah tum a ni.

Vailiamna inkhawma tarlan danin, mobile ICTC vehicle hi thingtlang hmun kilkhawra awmte'n district hospital-te an pan kher ngai loa HIV/AIDS chungchanga dinhmun an hriat theihna tur a ni a; pawl hrang hrangte nen ṭanghoin thingtlang khaw tin hrût chhuah tum a ni. Hetih lai hian, Mizorama hmun 41-ah HIV/AIDS vei leh vei loh finfiah theihna Stand Alone ICTC a awm tawh tih tarlan a ni.

Mobile ICTC hmanga kalpui tur zingah - khaw hrang hrangah kala HIV/AIDS chungchang inzirtirna neih pahin counselling leh thisen endik te, nau paite thisen health sub-centre-a endik te, HIV/AIDS vei theia ngaih (high risk group)-te an khuaa endik te, mimal damdawi-ina damlo awm, HIV finfiah ngaite enfiah te, thingtlanga health camp buatsaih te, jail-ah chawlkar tin HIV test kalpuite a tel. Integrated STI, HIV, TB, Hepatitis (ISHTH) campaign buatsaih te, Champhai leh Mamit district-ah cross border intervention tihte a tel bawk.

Health Minister chuan, Mizoram chu HIV/AIDS vei tamna leh cancer hluarna state a nih avangin beihpui thlak a ngai tih sawiin, HIV/AIDS leh cancer do hneh turin Health department-a thawkte inkarah thawhhona ṭha leh mipui ṭanrualna a pawimawh thu a sawi.

Mizoramin hmingṭhatna tam tak a nei tih sawiin Minister chuan, "Ram mawina leh ṭhatnate hi hnam dang lakah lan chhuahtirin a awm mek. Mizoram hi ram pum leh state chhung mipui náwlpui hriselna tehfung pawimawh tak infant mortality rate-ah a ti ṭha ber state a ni," a ti.

Dr R Lalthangliana chuan, mobile ICTC chu district tinah National AIDS Control Organisation (NACO)-in a phal angin motor leh counsellor, laboratory technician leh driver-te pek vek a nih thu sawiin a sawi a, "District pasarih tan motor thar lei theih a ni a, hengte hi Aizawl East, Aizawl West, Mamit, Kolasib, Champhai, Serchhip leh Lawngtlaiah dah tur niin, an ṭangkaipui ngei ka beisei," a ti a; kum 2023-24 chhungin district dang dil mek a ni a, a thuphungin NACO-in an pawm tawh niin a sawi.