Suma duhâmna hi zu leh ruihhlo angin a ngawl vei theih a ni - MZU VC

St. Joseph Higher Secondary School, Aizawl chuan nimin khan Vanapa Hall-ah HSLC 2023-a result ṭha tak an neih lawmna leh Annual Sports kharna inkhawm an hmang a; khuallian Mizoram University vice chancellor Prof. Dibakar Chandra Deka chuan, suma duhâmna chu zu leh ruihhlo anga a ngawl vei theih a nih thu a sawi.

MZU Vice Chancellor chuan, zirlaite chu eizawnna kawng eng pawh zawh se, sum lak luh danah rinawm tlat turin a chah a, "Dik leh zahawm takin sum in la lut tur a ni a, suma duhâmna hi ruihhlo leh zu anga ngawlvei theih a ni. Sum hi chu nunah a pawimawh a, mahse, dik leh zahawm taka lak luh tur a ni. Ngawlveite chuan an ngawlveina piah lam bak an ngaihven tawh loh avangin fimkhur ang che u. Khua leh tui ṭha nih hi kan mawhphurhna a ni," a ti.

Prof. Dibakar Chandra Deka chuan, HSLC pass chu bul ṭanna rahbi hmasa a nih thu sawiin, "Hlawhtling turin marathon intlansiakna in hmachhawn dawn. Tawi tê chak deuh tlân loin, châwl loa thui tak tlân turin inpuahchah rawh u. Hlawhtlinna ken tel chu thawhrimna, rinawmna leh dikna a ni," a ti a; sikul, nu leh pate leh ram theihnghilh ngai lo turin zirlaite a chah.

Inkhawm hi St. Joseph HSS principal C Laltlansanga'n a kaihruai. HSLC 2023-ah khan St. Joseph HSS zirlaite an pass vek bakah, top 10-ah mi pasarih an lang a ni.