Khawtlang hmasawnna atan rorel lai VC/LC neih kher a ngai lo - Congress

Mizoram Pradesh Congress Committee (MPCC) Media department chuan August 8, Inrinni khan Aizawl Press Club-ah thuthar thehdarhtute an kàwm a, khawtlang hmasawnna atan rorel lai VC/LC neih kher a ngaih loh thu an sawi. 

MPCC Media chairman Dr Lallian­chhunga chuan, August 27, 2020-a LC leh VC inthlan turah state sorkara rorel mektu MNF-te'n an party candidate-te thlan tlin chauhin khua/veng tan hmasawnna leh hamṭhatna awm thei tur angin thu belhchian dâwl lo an sawi tih a sawi a, "15th Finance Commission chuan kum 2020-21 atan VC-te hman tur Rural Local Body Grant (RLBG) cheng vbc. 93 min pe a, hei hi ruling leh opposition VC-ah rualkhai taka sem tur a ni," a ti. 

Dr Lallianchhunga chuan, RLBG sem rual dan tur pawh Finance depart­ment-in tehfung an siam, mihring tam dan leh khaw zau zawng hmanga kalpui tur a nih thu sawiin, "Mihring cheng zat hian 90% kengin, khaw zau zawngin 10% chiah a keng. VC zawng zawngin an population leh area milin an dawng vek dawn," a ti a; RLBG sem dan tur chu LAD Minister thupeka tihdanglam theih a nih loh thu a sawi.

Mizoram State Finance Commission hmasa ber rawtna ang chuan, state thawh chhuah (annual state own revenue) aṭanga 15% chu tualchhung sorkar (ADC, AMC leh VC)-te chanvo tur a nih thu sawiin Lallianchhunga chuan, "Hetiang a nih mek laiin kum 2019-20 leh 2020-21 LAD budget-ah VC-te'n hma­sawnna an thawhna tur sum major works-ah pakhat mah MNF sorkarin a dah lo. Kum 2017-18 ah nuai 3,000 leh 2018-19 ah nuai 5,100 dah a ni," a ti.

MPCC Media hruai-tute chuan, khawtlang hmasawnna atan rorel lai VC/LC neih kher a ngaih lo tih sawiin, "Ruling VC/LC neih aiin, khua/veng hmangaihtu leh mi inpe neih a ṭha zawk," 

an ti. MPCC hruaitute chuan, contract inchuha phe buai mai mai tur ruling MNF VC/LC neih ringawtin awmzia a nei lo tih sawiin, "Khawtlang roreltu tur, rin ngam, mi ṭha i thlang ang u. Ruling VC/LC hnuaia ruling party unit-te'n hna an thawk ṭha tak tak thei lo," an ti a; ruling party unit/worker-te hnathawh endik turin eptu VC/LC an ṭhat ber thu an sawi.

National Food Security Act (NFSA) Beneficiary Selection Committee member ruat danah party induhsakna a nasa hle tih sawiin MPCC Media hruaitute chuan, "Committee-a tel tur khawtlang mi zahawm (prominent citizen) pahnih pawh ruling party worker aṭangin ruat an ni a, term hmasa-ah chuan prominent citizen aiawhin YMA, MUP, etc. aṭangin ruat an ni ṭhin. VC/LC-te hi political party behchhana tling an nih avangin, party induhsakna a nasat loh nan prominent citizen ruat an ni ṭhin," an ti.

MPCC Media department chuan, Mizoramah political party dang aṭanga lungawi lo tlân kawmte chu inhlâwm khawmin, eng hming emaw inphuahin îtawm takin intarlang ve ṭhin mah se, an ding chhuak tak tak ngai lo niin an sawi a, "Hotu nih duh vang leh lansarh duh vanga pém khawmte hi an pèm khawmna chhan bawk hian chhungril aṭangin a ei chhe leh tho a ni," an ti. Kum 2018 MLA inthlanpui zawha pawl keh darh hmasa ber chu ZPM niin an sawi bawk.