CM leh Gauhati HC Chief Justice-te'n High Court building thar an enfiah

Chief minister Zoramthanga leh Gauhati High Court chief justice Justice Sandeep Mehta te chuan nimin khan MINECO-a High Court building sak thar an enfiah.

CM Zoramthanga chuan, Gauhati High Court Chief Justice-in Mizoram a rawn tlawh chu lawmawm a tih thu sawiin, High Court building thar chu hawn thuai a nih a beisei thu te, ṭangkai taka hman a nih a beisei thu leh Mizoram sorkar aṭanga mamawh a awm a nih chuan a inhawn reng thu a sawi.

Justice Sandeep Mehta chuan, Mizorama High Court building sak chungchangah a bulṭhut aṭanga a hmáwrbàwk thlenga Mizoram sorkar duhsakna an chang chu a lawm thu a sawi a; HC building chu state dang tan pawh entawn tlak tak a nih thu leh luah luh thuai a beisei thu a sawi bawk.

PWD hotute tarlan danin, High Court building hi Non Lapseable Central Pool of Resources aṭanga hmuh cheng nuai 4,624 hmanga sak a ni a; sum hmuhin a ken tel loh ṭul leh mamawh dangte siam nan Mizoram sorkara SEDP leh sum hnár dang aṭangin hna thawh a ni.

High Court building enfiahnaah hian Law & Judicial minister TJ Lalnuntluanga, Gauhati High Court judge pahnih Justice Michael Zothankhuma leh Justice Marli Vankung, chief secretary Dr Renu Sharma leh sorkar hotu dangte an tel.