Accredited journalist-te thu leh hlain belhchian a dàwl bik - Minister Ruatkima

Information and Public Relations department-in kum 2023-2025 chhung atana press accreditation card a siam thar hlanna inkhawm nimin khan IPR Auditorium-ah buatsaih a ni a; khuallian IPR minister Lalruatkima chuan, print media, electronic media leh accredited journalist-te thu leh hlain belhchian a dàwl bik thu a sawi.

Mizoram sorkarin kum 2023-2025 chhung atana accredited journalist-a a pawmte chu mi 140 an ni a, chu'ng zinga mi 51 chu Aizawl district-a mite niin, mi 89 chu district danga mite an ni. IPR Minister hian MJA president C Lalrambuatsaiha leh accredited journalist-te hnenah card a hlân a ni.

Press accreditation card semna inkhawm hi IPR director C Lalnun­kima'n a kai­hruai a; IPR minister Lalruat­kima chuan, sorkarin chanchinbumite a dah pawimawh hle tih sawiin, accredited journalist ni tura State Press Accre­ditation Committee-in uluk taka a thlan chhuahte chu ṭangkai taka accre­ditation card hmang turin duhsakna a hlan.

Youtube leh social media khawih ṭhin tam takin journalist ethic an hriat loh thu leh social media hmansual a tam thu sawiin Minister chuan "Journalist ethic-in a phuar veah an inngai lo ṭhin. Fimkhur tura chanchinbumite'n kan zirtir a ngai. Ṭawng hman danah dik tâwk lo a tam lutuk chuan kan kal zelna turah mipui min kaihruai dik lo thei a ni," a ti.

Lalruatkima chuan, print media, electronic media leh accredited journalist-te chu zirtirna dawng ṭha vek tawh an nih avangin an thu leh hlain belhchian a dàwl thu sawiin, "Belhchian a dâwl mai ni loin, a rintlak bik a ni. Chumia innghat tur chuan mipui kan zirtira kan kaihhruai a ngai," a ti a; journalist-te'n an rintlakna a vawn nun zel a ṭul thu a sawi.

IPR Minister chuan, journalist-te chu an thu puanzàrin ram inrêlbàwlna thlenga nghawng a neih theih avangin an pawimawhna hre thar tur leh an thu leh hlate uluk lehzuala endik turin a fuih. Mipui hnena chanchin thar thlentu leh mipui kaihruaitu pawimawh tak an nih angin, an mawhphurhnate hlen a, mipui hnena chanchin dik tak leh belhchian dâwl chauh puangzar tur leh technology chhuak tharte ûm pha tura insiam rem thiam tur leh intuai hriam zel turin a chah bawk.

Lalruatkima chuan, Mizoram sorkarin journalist pension a buaipui mek chu Law & Judicial-ah an pawm (vet) tura a awm mek thu sawiin, "Law lamin an vet fel chuan kan inpe hman turah kan ngai," a ti.

Press accreditation card inhlannaah hian MJA president C Lalrambuatsaiha pawhin thu a sawi a ni.