ZMC leh MSCI-in hma a sawn - MNYF

Mizo National Youth Front (MNYF) chuan thuchhuah siamin, Mizoram State Cancer Institute (MSCI), Zemabawk leh Zoram Medical College (ZMC), Falkawn in hma a sawn nasa hle niin an tarlang.

Mizorama cancer natna neite'n mahni tualzâwla inenkawlna changtlung taka MNF sorkar Zoramthanga kaihhruai leh Health minister Dr R Lalthangliana hmalakna avangin din chhoh zel a nih thu tarlangin MNYF chuan, "Mizoram mai ni lo, ram pawn mai bakah state ṭhenawmte'n an rawn chhawr ve thei ta hi lawmawm kan ti hle," an ti.

MNYF chuan tun hnai khan MSCI hmasawnna hrang hrangte an fang kual tih tarlangin, "Mizorama cancer inenkawlna dawng turin state pawn aṭang mai bakah rampawn aṭangin an lo kal," an ti a, tun hma lama Mizo cancer natna veiin phai lam an panna ṭhin state-te pawhin Mizoram an rawn pan niin an tarlang.

MNYF chuan ZMC-a sorkarin hmalakna tam tak a neihah natna hrik chi hrang hrang hmuh chhuah theihna khawl (genomic sequencing machine) USA siam, hmarchhaka awmchhun chu ZMC-ah ṭangkai taka hman mek niin an tarlang.

Sorkarin ZMC tan hmalakna lian tak tak a nei mek tih tarlangin MNYF chuan, "Man chawia hman theih tur cabin room 60 sak mek leh, doctor internship ti mek room 60 awmna tur a sa mek a, zawh fel a ni ṭep tawh. MNF sorkarna hnuaiah mipui ban phak turin sorkarin mipui tan hna a thawk zel a ni," an ti.