Mi eng emaw zat CSE Prelims-ah an tling

UPSC-in May 21, 2023-a Civil Service Examination, 2023 preliminary exam a buatsaihah Aizawl Centre-a exam zingah mi 12 an inziak tling a, an zinga mi 10 chu Mizo niin, pahnih chu hnam dang an ni. State hrang hrang aṭanga inziak tling Zo hnahthlak mi 40 vel an awm bawk.

Thu dawn danin, CSE 2023 prelims-a Aizawl Centre aṭanga Mizo inziak tlingte chu - KC Zalena, Vanlalawmpuia, Vanthang-puia, Vanlalhruaii, F Lalruatsanga, Dennis Chozah, J Lalawmpuia, Thomas Maratha Hlychho, Samuel Laldinthara leh Francis Lalṭhazuala te an ni a; an zinga mi pali chu Mizoram Youth Commission (MYC) puihnaa coaching kalte niin, chu'ng mi pali zinga pathum chu MYC Super IAS hnuaia inzirte an ni.

MYC hian Super IAS hnuaiah ṭum hnih zirlai an buaipui (sponsor) tawh a, kum 2021 khan Super IAS 20 hnuaiah mi 20 chu Delhi-ah crash course an kaltir a, chu'ng zinga mi pahnih chuan Aizawl Centre aṭangin CSE 2023 prelims an paltlang. Kum 2022-ah Super IAS 40 hnuaiah mi 35 an sponsor a, an zinga pakhat chuan kumin hian Delhi Centre aṭangin prelims a paltlang. MYC-in Super IAS hnuaiah mi 55 an buaipui tawhah kumin hi CSE prelims paltlang an awm ṭum khatna a ni.

Mizo Students Union (MSU) chuan thuchhuah siamin, UPSC-in CSE 2023 prelims result a tihchhuahah Zo hnahthlak mi 38 an tling niin an tarlang a, "Lawmawm kan ti tak zet a, main exam an paltlang ngei theih nan duhsakna kan hlan," an ti.