ZPM Ṭhalai-in LMC-ah pawisa an hlàn

ZPM Ṭhalai chuan, Lunglei Municipal Council (LMC) inthlanah Lunglei mipui duhsakna dawnga ZPM-in sorkarna an siam avanga lawmthu sawina atan leh Lunglei mipui tana an hnatlàn vena atan tiin nimin khan LMC councillor-te hnenah Rs 43,100 an hlàn.

ZPM ṭhalaite hian pawisa an hlan hi 'Thank you Lunglei' tih programme an huaihawt hnuaia ZPM Ṭhalai Headquarters hruaitute leh party mite thawh khawm a nih thu an tarlang. Pawisa hi LMC aiawhin chairman Lalzuithanga’n a dawng a ni.

ZPM Ṭhalai vice president Zoramchhana Sailo chuan, LMC councillor-te Lunglei khawpui tana a taka che chhuaka an hnatlang chuan ZPM Ṭhalai Headquarters hruaitute rilru a hneh thu leh mawi an tih thu a sawi.

LMC chairman Lalzuithanga chuan, ZPM Ṭhalai Headquarters-in Lunglei mipui a ngaihsakna chu lawmawm a tih thu sawiin, Lunglei mipui leh ZPM ṭhalaite inṭhian ṭhatna leh inunauna sawh nghettu a nih a beisei thu a sawi bawk.