KHAWTHLIR

Thisen pe

Boston Higher Secondary School, Mission Veng chuan nimin khan an sikulah thisen pek an huaihawt a, mipa 37 leh hmeichhia 10-te'n Civil Hospital, Aizawl tan thisen unit 47 an pe. Project Pushpak pawhin nimin khan World Blood Donor Day (June 14) pualin Civil Hospital, Aizawl tan thisen unit 21 an pe bawk. LDF Cable Network, Lunglei chuan an silver jubilee (June 17) pualin June 12 khan Civil Hospital, Lungleiah thisen pek an huaihawt a, mipa 43 leh hmeichhia 13-te'n thisen an pe a ni.

MJA an lawm

Mizoram Journalists' Association (MJA) Gen. Hqrs chuan thuchhuah siamin, Tourism dept bultuma MJA member 11-te'n June 9-10, 2023-a Thenzawla Tourism department hmalakna hrang hrang leh Police Training School (PTS) an tlawh thei chu lawmawm an tih thu an tarlang.

MUCO-in loan nuai 4,155 an pe

Mizoram Urban Cooperative Develop-ment Bank Ltd (MUCO Bank) chuan nimin khan Synod Conference Centre-ah Annual General Assembly vawi 29-na an hmang a, financial year 2022-23 chhungin deposit cheng nuai 7,079.81 an hmu a, loan cheng nuai 4,155 an pe chhuak tih tarlan a ni. Kum 2023-2028 chhunga Board of Director turte thlan niin, chairman atan R Liantluanga an thlang.

Tanpuina hlan

Assam Rifles chuan Kawlbem khuaa Manipur aṭanga sahimna zawnga awm mekte hnenah June 12, Thawhṭanni khan ṭanpuina chi hrang hrang an hlân. Assam Rifles hotute chuan, AR chu tlang mite ṭhian a nih angin, Manipur aṭanga sahimna zawnga Mizorama lutte an theih ang angin an lo buaipui a, hma an la zel dawn tih an tarlang.

Blood Donor Day

Vawiin June 14 hi World Blood Donor Day a ni a, MSACS leh Association for Voluntary Blood Donation bul tumin district hrang hrangah hman a ni dawn. WBDD hi Aizawlah chuan Health Minister hoin hman a ni dawn a, kum 2022-23 chhunga pawl hminga thisen pe ṭhate hnenah chawimawina hlan a ni ang.

MLA-in ráltlânte a tlawh

Aizawl South-III bialtu MLA Prof. F Lalnunmawia chuan Manipur tualchhung buaina avanga sahimna zawnga rawn lut, a bial chhung, Hlimen YMA Hall-a awm mekte a tlawh a, buhfai, alu leh dailuah a pe. MLA chuan, Mizoram sorkarin Manipur buai vanga Mizoram rawn bêlte theihtawpin a chhawmdawl mek tih sawiin, thlamuang taka awm turin a chah. Hlimen YMA Hall-ah hian Manipur ráltlân mi 20 an awm mek a, Hlimen YMA-in buaipuiin, an pualin khawtlangah vehbûr an khawnsak tawh a ni.

Siaha DLEO pisa

Labour Employment, Skill Development & Entrepreneurship minister Lalchhandama Ralte chuan nimin khan Siahaa district labour and employment officer pisa sak thar a hawng. DLEO pisa hi October 31, 2012 khan a kâng a, kum 2018 khan Special Plan Project aṭanga hmuh cheng nuai 15.94 hmangin sak ṭhat ṭan a ni. December 2022 khan SEDP aṭangin cheng nuai 14.40 hmuh leh a ni a, a vaia hmuh cheng nuai 30.34 hmangin sak zawh a ni.

Zotlang HSS hawng

Lunglei North bialtu MLA Dr Vanlalṭanpuia chuan nimin khan Zotlang Higher Secondary School, Lunglei building thar a hawng. MLA chuan, incheina leh pawn lam lan dan ringawtah changkan tum lo a, zirna leh thiamna bakah, mahni theihna hman ṭangkai kawng ṭan la thar turin zirlaite a fuih a, "Zirtirtute'n zirlaite hma lam hun in sial thiam a ngai a, zirlaite pawhin ṭhahnemngai taka inpumpekna nena in zir a ngai a ni," a ti.