KHAWTHLIR

North Eastern Development Finance Corporation Ltd. (NEDFi) chuan nimin khan an head office, Dispur, Guwahati leh hmarchhak state-a an office hrang hrangah an silver jubilee - 25th Incorporation Day an lâwm. NEDFi hi kum 1995-a din a ni a, kum 25 chhungin project 6,800-ah loan an pe tawh a, corporate social responsibility aṭangin hmarchhak state pariatah mipui tan thil tam tak an ti tawh bawk.

State Referral Hospital (SRH)-ah nimin khan Covid-19 vei pakhat leh rinhlelh pakhat dah luh a ni a, Inrinni khan rinhlelh pakhat dah luh a ni bawk. SRH-ZMC Bulletin tarlan danin, SRH-ah hian hripui vei mek mi 43 an awm mek a, ICU-ah pakhat, SICU-ah pathum leh Isolation Ward-ah 39 an awm. ICU-a enkawl hi ventilator la hmantir zel a ni. 

August 8, Inrinni khan Lunglei Civil Hospital (LCH) laboratory-ah TrueNAT-PCR hmangin mi 26-te swab sample endik a ni a, Covid-19 vei hmuh chhuah thar an awm lo. August 7, Zirtawpni khan mi 24-te sample endik a ni bawk a, hripui vei hmuh chhuah an awm lo. 

Pathianniin Aizawl khawpuiah phalna nei lo lirthei veivah khap ni mah se, Vanglaini palaiin nimin chhuna Aizawla kawngpui lunlai a zir chiannaah lirthei veivak an tam hle a; kawn pawimawh zual deuhah lo chuan Traffic Police leh Police duty hmuh tur an awm lo thung. 

Hnahthial South VC-III siam thar a nih dana lungawi loh vanga Hnahthial Lungleng veng ṭhalai mi 43, August 6, Ningani tlai aṭanga chaw nghei mek zinga mi paruk - hmeichhia pali leh mipa pahnihte chu nimin khan damdawi-inah hruai an ni a, hmeichhia zawng dah luh (admit) an ni. Chaw an ngheina hmunah hian nimin khan Hnahthial DC leh SP-te'n an tlawh.