Bristish Army-ah Mizo 23 an awm mek

Mizo zingah Bristish Army-a ṭang mek mi 23 an awm a, chu'ng mite chuan British Army Mizo tih páwl an din. An pawl secretary Lalrintluanga Chhangte chuan, British Army-a ṭang turin agency kaltlanga recruitment tih chu phal a nih loh thu a sawi a, chumi chungchang chu Mizoram Youth Commission hnenah a hriattir.

Lalrintluanga Chhangte-in MYC hnena an dinhmun a hriattirnaah chuan, commission (sum) laa British Army-a ṭang tura recruitment neih chu dan kalh a nih thu te, Commonwealth (British ram awp ram ni tawhte) ram mite tan Bristish Armed Forces-ah luh theih hun hawngin, sum chawi ngai loa luh theih a nih avangin sum inlaksak a, mimal/agency emaw kaltlanga recruitment tih phal a nih loh thu te, agency kaltlanga thil tih chu hun kal zel turah Mizo ṭhalaite dâltu a nih theih avangin fimkhur a ngaih thute a tarlang.

British Army Mizo Secretary sawi danin, British Army-a ṭang mek Mizo 23 zingah hmeichhia pakhat a tel a, United Kingdom (UK) ram chhung hmun hrang hrang bakah, UK páwnahte an awm a ni.