Serchhip MJA-in vaimím chìnna hmun an tlawh

MJA, Serchhip member-te chuan August 7, Zirtawpni khan Serchhip district agriculture officer C Lalnithanga ruahmannain Hualtu leh Hmawngkawn rama Agriculture department enkawlna hnuaia vaimim chìnna hmun an tlawh a; vaimim chíngtute chuan nikum aiin kuminah vaimim thar tam an inbeisei thu an lo hrilh.

Hualtu leh Hmawng-kawn khuaah hian chhungkaw 80 velin Agriculture department kaihhruaina hnuaiah vaimim (project vaimim) an chíng a, chhungkaw pakhatin vaimim an chìnna hmun chu buh ṭín khat hmun aia zau hret vek a ni. Vaimim chu a ro/châr hun, August thla tawp lamah seng an tum a, a chár chu kg. khat Rs. 15 hisápin a hmunah an hralh dawn a, Agriculture department-in an leisak dawn a ni.

Serchhip MJA member-te sawi danin, Agriculture department-in SEDP hnuaiah Serchhip district-a ram acre 475-a zauah vaimim chin turin an ruahman a, vaimim quintal 3,800 vel thar theih an beisei. Vaimim thar zawng zawng chu Agriculture department-in a hralhna a ngaihtuahsak dawn a ni.