World Blood Donor Day hman a ni; Thisen pe ṭha pawlte chawimawi an ni

Nimin June 14 kha World Blood Donor Day a ni a, Mizoram hmun hrang hrangah hman a ni. Aizawlah chuan Mizoram State AIDS Control Society (MSACS) leh Association for Voluntary Blood Donation (AVBD) buatsaihin Dawrpui Multipurpose Hall-ah hman niin, Health minister Dr R Lalthangliana khuallian a ni a; kum 2022-23 chhunga thisen pe ṭhate hnenah lawmman/chawimawina hlan a ni.

Kum 2022-23 chhunga Mizoram puma páwl hminga thisen pe ṭha/tam ber chu National Service Scheme (NSS) niin, unit 6,093 an pe a, pahnihna KṬP-in unit 4,993 leh pathumna MṬKP-in unit 2,372 an pe.

Health Minister chuan, khawvel thiamnain a siam chhuah theih loh thisen hlu tak a thlawna pek chu hmangaihna leh lainatna lan chhuahtirna a nih thu sawiin, "A thlawna thisen pe ṭhinte hian chawimawi an phû a ni," a ti.

Mizote chu mi dang tana inpe, tlawm­­ngaihna thûk tak nei an nih thu sawiin Minister chuan, "Kan Kris­tianna nen pawh a inhmeh em em a, mi dangte ṭanpui leh mamawhte hnena inpekna nun nei kan ni," a ti a; mi dang tana inpekna chuan nun a tinuamin a tizângkhai tih sawiin, thisen pek chu a uiawm lo ti hre thar turin mipui a chah. AVBD hmalakna avangin a thlawna thisen pek pawimawhna mipui rilruah a tla na tial tial tih a sawi bawk.

AVBD general secretary Lalrinkima chuan, ṭum khata thisen pek ṭeuh aiin, pek zin a ṭha tawh zawk tih sawiin, páwl hrang hrang hruaitu, zirlai leh zirtirtute chu thisen pek chungchangah ngaihtuahna thar seng a, ṭum khata pek ṭeuh tum kher lo a, donation camp tam zawk neih tum turin a ngen.

WBDD 2023 pual hian hmun ṭhenkhatah thisen pek a ni a; Civil Hospital, Aizawl Blood Bank-ah Mizo Air Squadron NCC-in unit 21, 20th Mizoram Battalion NCC-in unit 10, CRPF-in 225 Battalion-in unit 11 leh BSF 38th Battalion-in unit 10 an pek bakah, individual donor pahnih an awm.

Siaha District Hospital-ah mipa 20 leh hmeichhia paliin thisen an pe a; Serchhip Dawngzawla awm BSF-te'n unit 24, BSF 20th Battalion-in Lunglei Civil Hospital-ah unit 25 leh Assam Rifles-in Lawngtlai District Hospital-ah unit 10 an pe bawk.

World Blood Donor Day 2023 thupui chu 'Give blood, give plasma, share life, share often' tih a ni a; Aizawla WBDD hmanna kaihruaitu Betsy Zothanpari Sailo, HFW additional secretary chuan WBDD lo chhuah dan a sawi a, MSACS project director Dr Lalthlengliani'n thisen peka Mizoram dinhmun tlangpui a sawi. Vawi eng emaw zat thisen pe tawh mi pahnih leh thisen unit tam tak lo dawng tawhte'n thu an sawi bawk.

WBDD hi Mizoram hmun hrang hrangah hman a ni a, thisen pe ṭha mimal leh kum 2022-23 chhunga pawl hminga thisen pe ṭhate hnenah chawimawina hlan a nih bakah, hmun ṭhenkhatah chuan thisen pek huaihawt a ni.

Sorkar kum liam ta, April 2022 - March 2023 inkar khan Mizoramah thisen unit 37,419 pek a ni a, chu'ng zinga unit 34,252 (91.54%) chu a thlawna pek (voluntary donation) a ni. Donation camp ni loa a thlawna thisen pek (individual donation) chu unit 10,744 a tling. Mizoram pumah blood donation camp ṭum 589 neih a ni a, chuta ṭang chuan thisen unit 23,508 pek a ni.