YMA Day vawi 89-na lawm a ni dawn; YMA a tlanchhe ngai lo - CYMA President

Vawiin June 15 hi YMA Day vawi 89-na a ni a, Mizoram chhung leh state pawna branch hrang hrangin an lawm dawn a, Central YMA hruaitute'n hmun hrang hrangah an hmanpui ang. Central YMA president R Lalngheta chuan, YMA chu Mizote tana a tih theih tâwkah a tlânchhiat ngai loh thu a sawi.

Central YMA President chuan nimin khan YMA Day thuchah a tichhuak a; YMA branch hrang hrangte chu YMA Day hlim leh nuam taka hmang tura duhsakna hlanin, "Kan ram, kan hnam a lo pàr chhuah a, hnam anga kan dinchhuah zel theihna atan YMA hi a pawimawh. YMA tivul zel turin nang leh kei hian mawhphurhna kan nei tih i hria ang u," a ti.

R Lalngheta chuan, YMA branch, group, sub-headquarters hruaitu puibàwm tura YMA member-te sáwmin, "Mi tling lo tê tê awm khawmte pawh hi a theih ang anga kan puihbawm a, kan ṭawngṭainaah kan hriat reng a ngai," a ti a; Mizo hnam a dinchhuahna atan lungrualna leh ṭanrualna a pawimawh tih hria a, theihtawp chhuah zel a ṭul thu a sawi.

YMA-in Mizo ram leh hnam tan theihtawpin ke a pên ṭhin tih sawiin Lalngheta chuan, "A tih theih chinah Mizo fate tan a tlânchhe ngai lo. Ṭanpui ngaite ṭanpuitu a nih angin, ṭanpui ngaite ṭanpui kawngah ke pên thar leh ila, pachhia, fahrah, hmeithai, mang­angte tan nu leh pa a ni tawh ṭhin angin an tan malsawmna i ni zel ang u," a ti.

CYMA President chuan, Myanmar, Bang­ladesh leh Manipur aṭanga sahimna zawnga Mizorama rawn lutte Mizo mipui leh YMA-ten an lo tuamhlâwmnaah lawmthu sawiin, "Zo hnahthlakte inpui chu Mizoram a ni a, hei lo chu inpui an nei lo. Theihtawp chhuaha lo tuamhlàwm hi kan tih tur a ni," a ti a; YMA Day hmang thei loa sahimna zawnga tlanchhiat ngaia an awm chu pawi a tih tak zet thu a sawi bawk.